Parlamento lo presenta concepto di ley pa un maneho di tolerancia riba piscamento cu harpun

614

For di e declaracionnan di Minister di Agricultura, Cria y Pesca Chris Romero y su colega di Medio Ambiente, mr. Marisol Lopez-Tromp por deduci cu Parlamento finalmente ta bay produci un solucion pa piscadonan cu harpun.  Ta usa ‘finalmente’ pasobra e unico punto cu ambos mandatario ta acorda ta e hecho cu esaki ta un asunto cu por a keda soluciona di basta tempo pasa. Awe ambos, ademas di Minister di Husticia, mr. Andin Bikker a contesta pregunta di Parlamentarionan durante un reunion publico.

Na final di e reunion, Minister Romero a declara na prensa cu for di prome cu e tabata minister, specificamente na 2005, el haci intento pa hala aden e prohibicion riba piscamento cu harpun, pero a cita tratadonan internacional como e obstaculo. Awe den Parlamento el a manifesta di ta pro pa introduci un maneho di tolerancia, mientras ta cana e caminda pa un Decreto Nacional nobo riba e tema.

Di su banda, Minister mr. Lopez-Tromp a indica cu ta for di 2018 Departamento di Agricultura Cria y Pesca a emiti un conseho riba cual por a regula tur aspecto rond di piscamento na Aruba, incluyendo esun di harpun. “E trabounan cu mester a wordo haci, no a wordo ehecuta; de lo contrario nos no a haya nos den pura pa bay regul’e.”

Minister Chris Romero, Marisol Tromp y Andin Bikker den Parlamento pa splica riba e asunto di spearfishing

Posted by 24ora on Friday, September 25, 2020

Basa riba declaracion di Minister Romero, Parlamento ta dunando e problematica rond di piscamento urgencia y pa proximo siman lo yama tur tres minister pa presenta y vota riba un iniciativa di ley cu lo permiti piscadonan local pa haci uso di harpun y pone ‘pan’ riba nan mesa. “A yega ora pa esaki tuma lugar,” el a bisa.

Tambe a duna di conoce cu, durante su reunion cu departamento di Guardacosta, e entidad aki a manifesta cu nan tambe kier wak un solucion lo mas pronto posibel. Nan posicion ta cu nan tin trabounan mas importante di haci cu controla ciudadanonan cu kier pisca. 

Mr. Lopez-Tromp como titular di Medio Ambiente su trabou ta pa percura e proteccion di cierto especie pa asina Aruba cumpli cu tratadonan internacional. Asina mes, e mandatario ta sinti cu te hasta despues di inicio di crisis, tabatin suficientemente tempo pa bin cu un iniciativa di ley, pareu cu un maneho caminda ta registra tur hende y pone condicion na un permiso pa pisca cu harpun. “Miho bo tin’e regula, menos prohibicion,” e mandatario a declara na prensa na su salida di Parlamento.