E Parlamentario cu den pasado semper tabatin un relacion masha estrecho cu MEP, esta Andre Bosman di VVD a expresa ayera cu ta tempo pa Gobierno di Hulanda interveni den garantisa un bon maneho financiero riba nos isla. Ta parce cu pasenshi di e Parlamentarionan Hulandes ta cabando, relaciona cu e asunto di supervision financiero riba finansa publico di nos isla. VVD awor ta poniendo presion pa Secretario di Estado, Raymond Knops, tuma medida contra Aruba.
Manera ta conoci, den un amienda prepara pa Rocco Tjon y Ady Thijsen di e Fraccion di MEP, a kita e poder di Conseho di Minister di Reino y CAft y a pasa e autoridad ey over na Parlamento di Aruba. Esaki a sosode den concordancia cu Gobierno di Aruba, kende den e mesun reunion ey a duna “stemadvies” na Parlamentarionan pa sostene e amienda. MEP a boga semper pa mas independencia di Hulanda y no tabata di acuerdo cu e poder di CAft, logra bou di Gobierno di AVP.
Pero, na e momento ey no a menciona cu e mesun Prome Minister Evelyn Wever y Minister Xiomara Maduro a firma un protocol cu e mesun Raymond Knops di Hulanda den cual ta garantisa cu lo alarga presencia di CAft na Aruba, cu lo sigui cu supervision financiero y cu Aruba lo cumpli cu e normanan impone den e memorandum financiero economico riba con lo aumenta entradanan y baha gastonan di operacion den e añanan nos dilanti.
Gobierno di Hulanda a considera e movecion aki di MEP como un sla “bou faha”. Ni e Secretario di Estado y pio e Ministernan na Hulanda por a kere cu e lider di MEP por priminti nan asina tanto cos y bira haci otro den Parlamento. Durante e reunion di Conseho di Minister di Reino na juli ultimo nan a laga e mandatario Arubiano sa cu Hulanda no tin ningun confiansa mas den dje y cu e no ta haci locual e ta bisa. Tambe cu Hulanda no ta desea pa cera ningun acuerdo cu Gobierno di Aruba tanten cu no draai bek e amienda di Rocco Tjon den Parlamento. Cu e realidad ey riba mesa awor Evelyn Wever ta sinta entre laga Tjon cay of laga Hulanda cay. Den ambos caso lo tin consecuencia pa su Gobierno!
Pa loke ta e pasenshi di Tweede Kamer di Hulanda, mester bisa cu no ta solamente Andre Bosman di VVD tin un opinion skerpi riba maneho financiero di Gabinete Wever-Croes. Parlamentario Nevin Ozutok di Groenlinks tampoco tin un bon palabra pa Aruba. Ronald vaan Raak di SP a bisa mas duro ainda “Het maakt mij niet uit wat er gebeurt”.
Cu e declaracionnan haci di parti miembronan di Tweede Kamer di Hulanda, por mira caba e direccion cu e discusion ta bayendo. Pa dia 20 di september mester tin mas claridad riba ki rumbo e relacion entre Den Haag y Oranjestad lo mester sigui. Si considera locual a sosode cu Sint Maarten y despues cu Corsou, ta inevitabel pa Aruba “scapa” di un aanwijzing pa e maneho hiba pa Minister Xiomara Maduro y su consehero, ex Minister Nilo Swaen, pa cu finansa publico di nos pais.
