Awe tabata un dia hopi special, segun Dave Martinus, presidente di directiva di Parlamento Hubenil (PH), mirando cu tabata instalacion di e directiva nobo pa 2020-2023.
Esaki sigur riba un dia manera awe, cu ta dia Internacional di Derecho di Mucha, ta sigur un honor di por a instala riba e fecha aki.
E ta un celebracion y a keda honra tambe di por a ricibi e bishita di prome minister y tambe minister di asuntonan social y labor, Glenbert Croes.
Loke ta importante riba e dia aki, e celebracion cu a haci, ta e comienso di un periodo nobo tambe pa Parlamento Hubenil. Aki ta caminda cu PH ta bay haya oportunidad. Sigur a compromete nan mes pa hiba PH den un era nobo, mas moderno, pero mas principal ta, duna e hobennan di Aruba un oportunidad pa tin un plataforma caminda nan por expresa nan mes, duna nan opinion.
Y tambe caminda cu nan por vocifera y duna conseho na Gobierno.
Reconocimento
Minister Glenbert Croes, encarga cu asuntonan social y labor, a comenta durante un sesion den Parlamento, lo tin un gran cooperacion di un padrino importante cu tin den democracia parlamentario, den persona di Ady Thijsen, cu lo t’ey bek den Parlamento pa nan tambe ora yega asina leu, haya nan huramentacion den e sala cu, e minister ta sigur, lo aspira nan pa un dia ta representante di nos comunidad.
Jennifer Arends-Reyes, parlamentario di fraccion di AVP, a comenta cu e fecha aki ta uno hopi special cual ta e Dia Internacional di Derechonan di Mucha. Den esaki tambe ta haya cu derechonan di mucha ta bay te cu 18 aña.
Parlamento Hubenil, e bos di e hobennan, tin e parti democratico pa nan eherce nan opinion, locual ta ideanan cu nan tin, ta algo fundamental y hopi importante pa nos pais y pa e continuidad di esaki.
Bisando esaki, ta desea e directiva nobo hopi exito cu nan trabaonan y pa asina nan por tin hopi bon idea y pa contribui asina tambe na e progreso di nos pais.
Prome minister, Evelyn Wever-Croes a expresa cu e directiva aki lo tin e dificil tarea pa rebiba y modernisa Parlamento Hubenil y hib’e na e siguiente nivel.
Participacion di hobennan ta fundamental den e mundo cu nos ta bibando aden awor aki. P’esey e mandatario ta compromete su mes pa duna PH un bos atrabes di reunionnan a base regular pa delibera riba diferente temanan di interes general di nos hobennan hunto cu Gobierno.
Tambe ta expresa e deseo di por mira talbes PH profila su mes mas internacionalmente, intercambia di experiencia, talbes cu Parlamentonan Hubenil den region. Talbes Corsou, Sint Maarten y hasta paisnan cu ta afilia na Parlatino, cual e Parlamento di Aruba tin un miembresia hopi activo.
Como miembronan di directiva di PH tin un bunita tarea su dilanti. E ta un reto si, cual e mandatario ta convenci cu e animo cu nan ta demostra, cu nan lo logra nan metanan.
