Parlamento: Forsanan ajeno ta menasando siguridad di nos pueblo

Awe tardi alrededor di 4:30pm, Presidente di Parlamento, mr. Juan “Ady” Thijsen, a manda un mensahe pa pueblo via su pagina di Facebook. Textualmente el a skirbi: “Forsanan ajeno ta menazando e seguridad, prosperidad y libertad di nos pueblo. Nos mester ta uni como un solo pueblo pa defende y salvaguardia e patrimonio y bienestar di nos digno pueblo. Esey ta nos deber pa cu nos yiunan pa tin un garantia pa un bon futuro. Dios bendiciona y cuida nos digno pueblo”.

E menseha aki sinembargo a causa decenas di reaccion den comentarionan. Mayoria a ataca e politico, demandando pa e suministra mas informacion. Cu si Bo bisa “A”, Bo mester bisa “B” tambe. E forma con e Presidente di Parlamento a zona den su publicacion, ta comosifuera otro pais of gruponan ta cla pa ataca Aruba of destabiliza siguridad. Ora e ta pidi pa nos uni pa defende y savagiardia nos patrimonio, a spanta hopi hende y a causa panico innecesario. Despues di basta critica, Ady Thijsen a aclaria cu mas bien e kiermen cu nos mester sigui desaroyonan internacional hopi di cerca relaciona cu Venezuela.

Ta obvio cu ora Presidente di Parlamento publica algo asina riba red social, mesora e ta causa panico. Esaki specialmente ora mira noticianan internacional den cual un guera sea civil na cas of cu forsanan internacional contra Venezuela ta un opcion. Nos a mira Comandante di Cuerpo Militar di Caribe Hulandes papia siman pasa y awo e mensahe aki a zona comosifuera Thijsen, den su rol di Presidente di Parlamento “lo tabatin mas informacion” cu e kier a comparti cu pueblo. Ta resulta awo cu no ta asina y cu mas bien, uzando palabranan totalmente robes, e kier a alerta pueblo pa sigui noticianan internacional di cerca y pa nos ta uni den e dianan aki.

Presidente di Parlamento mr. Ady Thijsen tabata un abogado conoci den casonan laboral, specialmente como abogado di Sindicato FTA e tempo aya. El a aparece prome biaha riba lista di MEP y a haya un cantidad record di voto riba su nomber, 818 voto individual. Di eynan el a baha drasticamente den e siguiente eleccion na 2009 te na 414 voto. A subi un tiki bek na aña 2013 na 475 voto. Den e ultimo eleccion liderazgo di partido a baha Thijsen riba lista pa pone cara nobo. Siendo number 13, asina mes el a logra un crecemento chikito y a acumula 511 voto individual. A priminti Thijsen un posicion halto den e ultimo eleccion y como tal a haci’e Presidente di Parlamento despues di eleccion.

Comments

comments