E Parlamento di St. Maarten, a pasa un mocion di desconfiansa contra seis di e shete ministernan den su Gobierno, incluyendo Prome Minister William Marlin riba diahuebs. E Gobierno a wordo desolvi y eleccionnan nobo lo wordo teni na Januari, gobernador Eugene Holiday a anuncia den un declaracion. Te cu asina leu, e isla lo wordo goberna pa un gobierno interino cu ainda tin cu wordo estableci, ANP a reporta.
E mocion di desconfiansa, sigui pa e falta di gana di Marlin pa bay di acuerdo cu e condicionnan di Hulanda pa provee ayudo financiero pa reconstrui e isla, despues cu el a wordo asota pa Horcan Irma na September. Marlin tambe a purba di forma un “gobierno nacional” riba diaranson, pero no por a haya e sosten pa esaki.
Parlamento a bay di acuerdo cu e condicionnan di Hulanda. E expectativa ta cu e Gobierno Hulandes lo haci entre 200 y 300 miyon di euro disponibel pa e fondo di reconstruccion. E dos condicionnan cu Hulanda a agrega na e fondo aki ta un comite di integridad wordo estableci pa percura cu e placa den e fondo wordo gasta manera mester ta y cu e Koninklijke Marechaussee tuma over e control di frontera riba e isla.
Prome Miniter Marlin inicialmente a nenga di bay di acuerdo cu e condicionnan aki. Pero bao di presion di e parlamento di St. Maarten, el a manda un carta pa Den Haag dialuna, bisando cu e ta acepta. Di acuerdo cu e secretario di estado, Raymond Knops di Asuntonan Interno y relacionnan di Reino, e carta di Marlin tabata demasiado ambiguo. Knops a responde positivamente pa e paso cu St. Maarten a tuma riba diahuebs, pero a agrega cu e crisis politico riba e isla a causa “hopi insiguridad”, di acuerdo cu ANP. “Nos no sa kico lo bay pasa. Mi ta bay refleha riba e situacion,” el a bisa.
Marlin tambe a ricibi hopi critica for di e populacion di e isla, kendenan tin cu bay warda mas largo pa ayudo financiero, debi na e complicacionnan politico.
