Parlamento di Kòrsou sin kuorum

165

Durante e último simannan komunidat di Kòrsou por a tuma nota ku 10 miembro di Parlamento, no a forma kuorum pa asina sigui ku reunionnan públiko. For di yanüari 2021 Parlamento di Kòrsou atrobe mester a kanselá reunionnan di Parlamento pa motibu di falta di kuorum.  

Parlamento komo e úniko organo demokrátiko skohí pa medio di un elekshon liber i sekreto tin e tarea di kontrolá gobièrnu i traha riba leinan. Komo e pia legislativo di nos  demokrasia ta esensial su bon funshonamentu. E mandato aki ta ankrá den nos leinan, pero tambe den e sentido di norma i balor di kada miembro di e organo.

Den aña 2020 un parlamentario mester a akudí na korte pa por bringa su derecho fundamental di keda eskohí komo miembro di parlamento i funshoná komo tal.  Lo ta sumamente lamentabel  i kostoso si e organo di Parlamento haña su mes konfrontá ku un situashon similar un biaha mas. Teniendo kuenta ku ya korte a dikta ku mester salbaguardia e derecho fundamental di e siudadano pa skohe su repesentashon.

Den representashon di Parlamento,  presidente di Parlamentio sra. Pauletta lo sigui konvoká reunionnan públiko durante e simannan promé i despues di elekshon pa asina garantisá ku a hasi lo máksimo pa duna ontinuidat na e trabouan di Parlamento. Banda di esaki Presidente di Parlamento tambe ta evaluá i ekslporá e opshonnan hurídiko pa sigurá kontinuidat di Parlamento. Un demokrasia bibu ta derecho, pero tambe responsabilidat di tur parlamentario.