Algo pasa di 10:30pm, Parlamento a termina cu votacion y aprobacion di Presupuesto 2019. Un total di 12 Parlamentario di MEP-POR-RED a vota na fabor di e ley di Presupuesto 2019 mientras cu 8 Parlamentario di AVP a vota contra. Parlamentario mr. drs. Richard Arends no tabata na trabou awe y consecuentemente no a vota. Ta pesey e resultado tabata 20 di e 21 votonan disponibel.
Tabatin 12 mocion den Parlamento awe di cual tabatin cu a pasa unanimamente (20 voto na fabor) entre otro esun di Parlamentario Robert Candelaria pa regla parkeerplaats pa personanan cu limitacion fisico, mientras cu algun mocion a pasa cu mayoria y otronan rechasa cu mayoria.
E highlight di e anochi sin duda tabata na momento cu Parlamentario Ricardo Croes di RED a haci un di dos intento pa pasa su mocion pa decriminalisa marihuana medicinal na Aruba. E mesun mocion cu no a pasa diabierna cu a causa cu el a rabia bay, awe diaranson el a lobby henter dia den coalicion pa purba busca e sosten necesario. A cambia e texto un poco, pero asina mes ora el a present’e, a resulta cu ni MEP, ni POR y ni AVP no kier a sostene su mocion, te pa e wordo someti na votacion. Esaki a bira e di dos “strike” contra RED dor di su partnernan den coalicion, relaciona cu e tema di Cannabis.
Si tur coa ta bon, mañan diahuebs lo trata e ley di cambionan fiscal. E ora si Parlamento lo baha cu reces te otro aña. E ley di LAFT, cu a ked’i trata e aña aki ainda, no a logra yega Parlamento na tempo.
