Parlamentarionan no ta uni den reduccion di salario

Parlamento di Aruba ta consisti di 5 fraccion, cu ta AVP (9), MEP (8), POR (2), RED (1) y miembro independiente Daphne Lejuez (1) pa hunto forma e 21 asientonan den e organo mas halto di nos pais. Mescos cu Gobierno, nan tambe awor mester baha nan salario y beneficionan. Pero, aunke cu awor a bay di acuerdo pa bah’e cu 20%, toch no ta asina cu ta tur fraccion tabata na fabor di esaki.

A nota cu a dura masha prome cu Fraccionnan a sali pa bisa cuanto nan ta dispuesto pa baha nan mesun salarionan y beneficionan. E prome pa sali tabata Parlamentario Alan Howell di e Fraccion di POR cu a pidi pa baha salario cu mil florin y pa pidi Ministernan pa haci mesun cos. E tempo ey e demas fraccionnan den coalicion, esta MEP y RED, a sali cataloga e mocion aki como populista y a vota contra. E tempo ey MEP a bisa di lo kier entrega mas ainda y pa mas tempo. De facto, a presenta un cambio di ley pa baha nan salario cu 10%, cu a resulta menos pa luna compara cu e mocion di POR. E unico diferencia cu POR a propone pa baha salario pa tres luna (pa cuminsa) mientras cu MEP a pidi pa bah’e te december 2020.

Comosifuera poco, despues cu e discusion a sali den prensa, Alan Howell a propone pa baha e salarionan cu 25%, mirando cu e empleadonan publico mes lo baha di nan cu 12,6% ora conta reduccion di salario hunto cu e vatantie-uitkering. E Parlamentario ta sinti cu e diferencia entre e ambtenaar y e Parlamentario ta mucho abou, pa cual el a expresa su interes pa bah’e cu mas, pues na 25%. E fraccion di POR a haya sosten di e fraccion independiente di Daphne Lejuez den e pensamento aki.

Sinembargo, ora a reuni den CHA, cu ta para pa Commissie Huishoudelijk Aangelegenheden di Parlamento, e Fraccionnan di MEP, AVP y RED a haya mayoria den e pensamento pa bah’e cu 20%. Esey tabata e maximo cu e miembronan di Parlamento tabata dispuesto pa entrega, mirando cu MEP a sali for di 10% di acuerdo cu e ley di Tjon/Thijsen.

A sali mucho trempan cu reduccion

Si scucha e conferencia di prensa di Secretario di Estado Raymond Knops awe mainta, e mensahe cla na politiconan ta: Cuminsa na corta di Boso mes y despues bin abou. Ta sinti cu e reduccion proponi awor pa Gobierno lo no ta suficiente y cargabel pa Gobierno di Reino Hulandes. Ta pesey e intencion di baha salario di Minister y Parlamentarionan kisas ta mucho trempan, pasobra lo ta miho keda cla cu Hulanda riba e reduccion total di gastonan di personal di Gobierno y e ora atende di e apenas 30 politiconan, esta 8 Minister, 1 Minister Plenipotenciario (Esun di Merca no ta conta) y 21 Parlamentario.

No tin autoridad moral

Pero e problema cu tin awor ta mas grandi. E reto no ta e suma cu lo baha di salario pasobra reduciendo salari di 31 hende hamas lo saca Aruba di nos problemanan financiero. Pero ta e “autoridad moral” cu Gobierno mester tin pa por acerca sindicatonan pa pidi pa baha salario di nan miembronan trahando den Gobierno of den companianan priva di Gobierno. Tin un dicho ta bisa “Drecha mundo cuminsa na Bo mes” y esey ta precisamente locual Gobierno ta purba di haci awor, pero te ainda sin mucho exito.

Coordinadornan y conseheronan ta keda un reto

Mas cu djis salario di Ministernan, e sindicatonan tin keho pisa riba e cantidad grandi di conseheronan y coordinadornan cu e Gobierno aki, mescos cu esun prome di AVP, tin riba nan payroll. E rabia ta bira mas grandi si mira e salarionan cu ta paga e coordinadornan aki, sin cu nan tin e educacion of preparacion necesario. Y pio ainda, un cantidad di nan no ta ni presenta na trabou of pio, nunca a presenta na trabou pa e ultimo añanan aki pero ta cobra tur fin di luna, sea nan ta ambtenaar cu 25% riba nan salario of nan tin contact cu un salario lucrativo.

Entre nan tin varios DJ y locutornan di radio cu ta traha tur dia na radio, pero no ta presenta pa conseha nan Minister riba asuntonan di PR. Tin di nan cu a tuma como ambtenaar caba den calidad di PR pero manda na disposicion di Minister y sin cu nan mester presenta na trabou. Ta e grupo specifico aki awor ta causando e rabia cu tin entre e ambtenaarnan cu si mester lanta trempan tur dia pa bay trabou y gana nan pan di cada dia honradamente.