Recientemente Parlamentario Sue-Ann Ras (MEP), como miembro di Comision di Educacion, cultura, ciencia, tecnologia y comunicacion di Parlatino, a reuni riba algun topico relaciona cu educacion na Panama. E reunionnan ta brinda uno e oportunidad pa intercambia y dialoga riba con por mehora varios aspecto legislativo como tambe maneho di educacion y e metanan di desaroyo sostenibel 2030. Recientemente Aruba tambe a conoce un plan di maneho nobo, pa loke ta trata curiculo nacional dirigi riba e metanan sostenibel.
1. Plan di desaroyo di Latino America, unda mester conecta e aspecto di comportacion humano for di chikito te grandi. Ta papia di e materianan nobo en conexion cu e metanan sostenibel 2030 y kico ta e retonan cu el a trece cu ne, a base di un scol piloto cu a uza na Brasil. A haci cierto ahustacion pa e materianan ta mas practico.
2. Proyeccion 2040 relaciona cu Educacion Superior, unda cu ta bogando pa haci un reflexion riba e modelonan di educacion universitario, ya cu nan no ta responde na e demanda di mundo contemporaneo. E materianan mester ta mas contextual, brindando mas di e aspecto tecnologico, genero, pertinencia social y impacto cultural. A pone hopi enfasis riba FORMACION DI DOCENTE, ya cu nan ta esunnan cu mester transmiti educacion y netamente nan, ta kedando atras.
3. Reconocemento di diploma dentro di region Latino America y Caribe. Esaki ta un dilema enorme y ta pisa masha riba e studiantenan y hasta ta un desmotivacion pa nan. A encurasha Parlamento den su totalidad pa bin cu dialogo legislativo y ehecutivo, pa defini kico por haci y crea oportunidad husto. A haci un apelacion pa bin cu dialogo intergubernamental: gobierno-parlamento-institucion, pa asina crea un maneho registra y certifica, pa brinda ekivalencia academico entre e paisnan.
4. Educacion como tarea di nos tur, ta keda un reto educativo. Nos mester haci compromiso real cu e metanan di desaroyo sostenibel, unda mester haci uzo di 3 medio pa logra esaki:
– infrastructura y ambiente di aprendizahe
– beca
– upgrading di e maestronan
“Como parlamentario nos mester percura pa fomenta cultura di evaluacion y inculca den e profesionalnan cu no tin alumno fracasa, sino sistema no funcional. Paso e modelo di enseñansa actual no ta sacia curiosidad y interes di e hobennan. P’esey mester plantea meta y mester pone indicador pa haci evaluacion husto y real. A duna bon conseho como tambe metodo tocante con nos mester sa den kico mester inverti den enseñansa y con pa evita corupcion den enseñansa!”, Ras a finalisa bisando.
