Den nos akuerdo di gobernashon 2017-2021tin menshoná ku gobièrnu di Kòrsou lo introdusí un plachi di number nobo i moderno pa outo.
Hasta t’asina ku Minister di Transporte Tráfiko i Planifikashon Urbano señora Zita Jesus – Leitu a duna deklarashon kaminda a splika ku e plachi nobo lo tin un chip den dje i ku esaki lo yuda outoridatnan haña informashon tokante e vehíkulo riba kua e plachi number ta pega pero tambe ku esaki lo yuda na momentunan di kòntròl i vigilansia. Den e akuerdo di gobernashon tambe tin stipulá ku lo bin ku aparatonan nobo pa keuringslokal pa por kùr outo na un manera mas moderno i efisiente.
Nos ta yegando fin di aña kaminda hopi di nos ta paga nos impuesto riba vehíkulo motorisá p’e proksimá aña esta 2019 mirando ku esun di 2018 ta kaduká 31 di desèmber.
Den kuadro di esaki Parlamentario pa frakshon di MAN sr Wimbert Hato a hasi algun pregunta na Minister di Transporte Tráfiko Planifikashon Urbano i Minister di Finansa:
- Kon ta para ku plachi number nobo, nan ta kla p’e proksimá aña ?
- Ora nos paga impuesto 2019 (motorrijtuigenbelasting) na desèmber 2018 nos lo risibí e plachi number nobo?
- Si dado kaso ta repartí plachi nobo lo tin e chip bèrdat aden?
- Tin e sistema outomatisá kla instalá kaba pa hasi kontrol?
- Si e sistema outomatisá no ta kla ainda pa ki dia esaki lo ta kla i den funshon?
- A kumpra aparatonan nobo pa Keuringslokaal pa hasi e sistema di kùrmentu di outo mas efektivo?
- Si t’asina kiko pueblo por spera di kiko e kambionan lo ta?
- Kuantu e plachi di number nobo lo kosta?
- Na momentu ku implementá e sistema nobo di kùr outo e gastu pa kùr outo lo oumentá ?
- Ta bèrdat ku motorrijtuigenbelasting lo subi i ku kuantu?
- Lo bin mas fasilidat kaminda ku por paga number di outo?
- Kiko lo bai hasi pa sòru ku tur hende ta paga nan motorrijtuigenbelasting manera lei ta preskribí?
- Kuantu vehíkulo tin riba nos kareteranan i kuantu e impuesto riba vehíkulo lo por generá si tur hende paga nan number di outo?
- Aparte di kòntròl di polis kiko Finansa tin pensa di hasi pa forsa kumplimentu ku pago di motorrijtuigenbelasting?
Outomobilistanan ku ta hasi uso di nos karetera i ku lo tin ku bai paga nan impuesto manera a kustumá ke tin klaridat kiko nan por spera i kiko ta e status di e plachi number ku chip den dje ta bin i kon e lo funshoná. Tambe klaridat riba kon keuringslokaal lo bai funshoná den futuro. Frakshon di MAN ta spera un klaridat riba e asuntu aki pa asina nos komunidat ta bon informá.
