PARLAMENTARIO PA FRAKSHON DI MAN YAËL PLET KIER SA KON TA PARA KU SEGURIDAT DI TURISTA

Ya pa basta tempu kaba nos por a bin ta tuma nota ku hopi turista ku ta bishita nos playa
nan aki na Kòrsou prinsipalmente den area di banda bou ta bira víktima di sea kiebro den
outo òf atrako.

Esaki sigur ta laga un smak hopi amargo serka e turista nan ku na momentu di regresá nan pais lo ta deseá di no bini bek Kòrsou i hopi biaha ta ekspresá nan eksperensia riba medionan sosial. Mirando kon ret nan sosial a avansá e notisia ta plama den frakshon di sekònde i por hinka nos pais den un lus negativo. Esaki tin komo konsekuensia ku e kantidat di turista ku ta bin bishita nos pais por baha. Manera ta konosí nos ekonomia di Kòrsou no ta pasando den su mihó tempu nan i pa esei nos mester sòru pa seguridat di e turista nan ku a skohe Kòrsou komo nan destinashon. Relashoná ku esaki Parlamentario pa Frakshon di MAN sr Yael PLET a dirigí un karta na Minister di Hustisia ku e siguiente preguntanan 1. Minister ta na altura di e kantidat di kiebro di outo ku ta tumando lugá na playa den kual turista nan ta bira víktima kada biaha di nobo di ladronisia i tambe atrako?

2. Kiko ta Politur su tarea enkuanto seguridat na nos playa nan? 3. Kiko ta e otro tarea nan ku Politur tin ku ta yuda garantisá seguridat pa turista? 4. Minister tin un maneho pa garantisá seguridat di turista nan ku ta bishita nos playa nan? 5. Ta posibel ku mi por haña di Minister kuantu kiebro den outo i tambe atrako a tuma lugá den 2016 i 2017 te ku awor aki i kuantu di e kaso nan a wòrdu solushoná? 6. E turista ku wòrdu atraká tin un proseso di guia pe te na momentu ku e regresá bek su pais? 7. Minister lo bini òf a bini ku un plan di konsientisashon pa e turista ku lo bin bishita nos pais relashoná su seguridat?

Comments

comments