Lider di fraccion di PPA den Parlamento, Otmar Oduber, a dirigi un carta dialuna 28 di juli ultimo, na Presidente di Parlamento Marlon Sneek, solicitando un reunion estilo di ‘vragenuur’ cu Minister di Finansa y Economia, mr. Geoffrey Wever, relaciona cu retiro otorga di drs. Greg Peterson como director di Free Zone N.V. y tambe pa haya informacion riba funcionamento di FZA e ultimo decada aki.
Parlamentario Oduber den su carta ta mustra cu a sali na cla e mal maneho di añanan largo di FZA pero tambe e hecho cu no a entrega placa di pensioen na Ennia pero tambe kier informacion riba e mal maneho financiero cu e compania aki a conoce.
Pa fraccion di PPA, lo ta na su luga pa pueblo haya claridad for di Minister Wever, kende for di aña 2021 tabata e minister encarga cu e compania aki y lo ta na su luga pa su persona bin duna claridad riba tur loke a bin ta tumando luga, entre otro cu a paga salario na director Peterson, sin cu un dia a atende cu su persona riba su produccion na cabes di Free Zone.
Su prome pregunta, parlamentario Oduber a pidi Minister Wever pa bin splica Parlamento e desfuncionamento di Greg Peterson cu a conduci na intervencion te na aña 2023-2024, despues cu ya Free Zone tabata bayendo malisimo durante añanan y tambe pa informa riba problemanan interno hopi serio.
Fraccion di PPA tambe ta señala cu un investigacion haci pa PWC den luna di augustus 2022, a indica cu henter e proceso financiero di FZA ta practicamente para, principalmente pa loke ta cualkier intencion pa atrae inversionnan nobo, aspectonan di innovacion y diversificacion cual nan no tabata existi mes segun e rapport menciona.
Ta pidi pa Minister Wever bin Parlamento y splica cua medidanan concreto su persona a tuma pa atende cu e stancamento ariba menciona cu a forma parti di e rapport di PWC y cu conduci na retiro di Greg Peterson y na mes momento e mandatario aclaria di con no a bay over na retira Peterson mas tempran.
Na mes momento Oduber lo kier pa Minister Wever con su persona a atende cu loke PWC a trece dilanti relaciona cu negligencia den uzo di instrumentonan di ley di e compania y cual lo ta e pasonan cu e mandatario lo a tuma of lo bay tuma pa asina garantisa tur e instrumentonan di ley cu tin pa maneho di FZA.
Minister Wever lo mester bin duna aclaracion di cual ta aspectonan specifico di gobierno pa loke ta e ley di e compania di FZA NV, cu segun rapport di PWC no ta funcionando manera cu esaki mester ta y cu entre otro gobierno no a cumpli suficientemente cu su rol como accionista di FZA NV pa medio di posibilidadnan di intervencion di e leynan aki.
Parlamento lo kier claridad concreto na unda cosnan a bay malo pa loke ta derecho y obligacionnan di accionistanan cu no a wordo respeta y cual ta medidanan cu gobierno lo bay tuma pa reforsa su rol di supervision conforme ley di e compania. Un total di 16 pregunta Parlamentario Oduber a dirigi na Presidente di Parlamento Sneek pa su persona manda esakinan pa Minister Geoffrey Wever.
Na Hulandes tin un proverbio cu ta bisa “achter het net vissen” ya cu e propio parlamentario for di october di aña 2009, su persona tabata den un posicion como miembro di tanto gabinete Mike Eman 1 y 2 te cu 2017 y atrobe Parlamentario Oduber tabata den gobernacion di e pais for di 2018 te cu luna di september di 2021, mientras cu den su preguntanan mes e ta sugeri cu Greg Peterson tabata den e posicion di Director di FZA decena largo y a permiti sin duda su desfuncionamento tuma luga.
Entre su preguntanan haci na Minister Wever, lider di fraccion di PPA ta mustra cu Peterson a keda na e posicion di director pa mas cu 20 aña largo y awor parlamento lo kier pa e mandatario di gobierno di coalicion AVP-FUTURO, bin duna informacion riba e hecho cu e no a funciona y tambe kico esaki a nifica den gasto financiero pa pais Aruba.
Apesar cu e parlamentario mes ta reconoce e falta di funcionamento di Peterson den FZA, e ta pidi den nomber di su fraccion di PPA, pa Minister Wever aclaria e hecho como cu e compania aki ta haciendo perdida y a retira director Peterson, kico lo ta e consecuencianan concreto di maneho financiero y operacional di e situacion cu a surgi awor pa FZA.
Pa 20 aña largo tur hende tabata sa cu FZA no tabata funcionando, mucho menos rendabel pero director Peterson a sigui den su puesto den un estilo di un “intocabel” y awor cu Minister Geoffrey Wever den nomber di gobierno a dicidi di duna Peterson su retiro, e tin cu bin duna splicacion na Parlamento.
Ta pidi Minister Wever pa bin duna un ‘update’ riba e situacion financiero actual di FZA y tambe riba e magnitud di e perdida despues di 2021 y ki meta specifico a ser establece pa cambia e perdida aki pa un rendimento?
Na mes momento ta pidi e mandatario pa duna un splicacion kico esaki ta bisa di e supervision y gobernacion den FZA cu e situacion aki por a continua casi tres decada largo y si Wever ta haya cu e rol di e Conseho di Comision den esaki ta suficiente profesional y independiente y con e ministerio a monitor e rol ey for di momento cu Minister Wever a asumi su funcion?
Tambe Otmar Oduber kier claridad con por a sosode cu pa añanan largo no a haci niun contribucion di pensioen na ENNIA na fabor di e personal y kico ta parti di minister Wever su responsabilidad den e falta grave aki.
Na final Parlamentario Oduber ta mustra den su carta na Presidente Marlon Sneek, cu ta inaceptabel cu durante añanan miyones di cen comunitario a wordo gasta riba un entidad cu no a funciona y cu no tin ningun produccion economico. Segun Otmar Oduber, e tempo di wak otro banda a pasa y e ta conta riba transparencia completo y responsabilidad politico di e minister den e caso aki.
