Parlamentario di AVP, Mike de Meza a splica cu e gobierno di MEP a haci su entrada na 2017, esta MEP, POR y RED, caminda cu tin dos partner cu ta contra di e existencia di e refineria, cu ta POR y RED, caminda cu a pone cuchiu riba mesa, caminda e prome minister mes a acepta y bisa pa e refineria bay y planta marihuana riba e tereno aki.
Esey ta e mentalidad cu tin. Por a mira di inmediato cu henter e proyecto aki di e refineria a cuminsa mira un decadencia y a cuminsa bay atras. E prome seis pa ocho lunanan, e prome minister di Aruba, Evelyn Wever-Croes, cu ta e minister di energia, no kier a sinta cu CITGO na mesa. Ehecutivo di CITGO di e nivelnan mas halto a bin Aruba y el a bisa cu e no tin tempo pa nan, e tin otro cos di haci.
Ora cu a scucha na September cu nan lo a bay sigui cu e siguiente fase, hinca un otro inversion di 30 miyon dollar, cual ta nada, pa un rehabilitacion di un refineria, nan a haci un fiesta grandi, bisando cu e trabaonan ta bay cuminsa.
Su colega sr. Glenbert Croes a drenta den e refineria, cuminsa kita contratista y e ta dicidi, locual semper nan ta haci, intimida, porsigui hende. Cua contratista mag keda y cua no. Instiga y pone presion riba gerencia tambe di e refineria, cu ta e manera ey e tin cu bay. Por a wak kico a tuma luga y despues por mira ni un dollar di e 30 miyon, no a yega Aruba. Un otro engaño.
Algun siman pasa, prome minister Evelyn Wever-Croes a bisa cu el a negosha cu autoridad Mericano, un trabao tremendo cu nan a haci, cu awor aki Merca a duna e general licence 7A liber, cu placa ta bin Aruba y cu awo ta sigui cu fase dos. Despues el a bisa cu no tin placa. Un otro engaño.
Awo diripente e tin cu traha un storia pa tapa su blunder. El a bin cu un otro engaño. Awo ta 180 miyon a disparce y insinua y specula cu por ta gobernantenan anterior lo por ta envolvi den esaki.
Segun de Meza, ta trata aki di prome minister di pais Aruba. Ora cu bisa e cosnan aki, ta bay internacional. Ta bo pais bo ta daña. Bo no tin ningun prueba y no tin ningun prueba tampoco, pasobra no ta berdad.
Gobierno di AVP a traha diligentemente, determina, cu amor pa pueblo, pa yega haya un operador, cu tabata dificil pa haya. E ora ey ta bay bisa e tipo di cosnan aki sin ningun investigacion, sin nada. Scucha un storia y crea un otro engaño riba dje.
Ta increibel cu un prome minister di un pais. Lastimamente cu ta na Aruba, tin un persona cu ta crea incertidumbre, cu ta crea speculacion, storianan. E ta increibel ora cu bo scucha esaki. De Meza ta hari ora cu e scucha e cosnan aki. Un bes mas e ta haci su mes macaco, e ta haci su mes idoot, ora cu bisa e cosnan aki. Cu cada bes ta mira cu pueblo ta bolbe garabo ta gaña.
Gaña bo ta keda gaña. E prome minister aki bo no por gar’e ta bisa berdad. Bo scuch’e tur dia, na un momento cu por gar’e ta bisa un cos berdad, no por gar’e. Gaña so e ta gaña, crea incertidumbre y daña nomber di Aruba.
Por mir’e tambe riba Facebook hunto cu su bon brother Bosman. Un persona cu mester ta un persona non-grata den e islanan Caribense Hulandes. Ta un persona cu kier a pone tur e islanan, Corsou, Aruba, tur, pa un florin riba mercado pa nan bay cun’e. E tin un rabia contra tur e Arubiano, e Curasoleñonan, Antiano, tur esnan cu tabata di seis pais.
