Parlamentario Mc William (Corsou): No por bin ku ningun entidat ku ta eliminá e “budgetrecht” di Parlamento

191

Manera ta konosí e situashon di Covid-19 a dal nos pais ekonómikamente hopi duru sigur pa e parti sosial, pero tambe pa loke ta trata e parti Finansiero. Gobièrnu di Kòrsou den su afan pa mantené kupo di trabou mas tantu posibel den diferente sektor i pa duna sosten na esnan konosí komo zzp’ers pero tambe pa kubri gastunan mensual di Gobièrnu a hasi petishon di sosten finansiero na Gobièrnu Hulandes konforme artíkulo 36 di nos Statuut.

E sosten ku a pidi ta en bista ku entradanan di Gobièrnu a bini ta kai atras drástikamente ku di tal forma no por kumpli ku su obligashonnan. Gobièrnu di Reino a bai di akuerdo pa fia Kòrsou sèn pero bou di algun kondishon pa e di 2 tranche. E kondishonnan ku Gobièrnu di Reino a bin kune a Gobièrnu di Kòrsou a indiká di lo bai di akuerdo kune. Pa loke ta trata e eksigensia pa bini ku un instituto di kual lo bai manehá e fondonan ku nos lo risibí di Hulanda ta algu ku nos no por bai di akuerdo kune paso esaki ta kontra di leinan di nos pais. Esaki mirando ku e fondonan risibí den forma di fiansa ta keda duna na Gobièrnu i mester pasa den e proseso di presupuesto di pais. Presupuesto di pais ta keda aprobá i kontrolá dor di Parlamento di Kòrsou kual ta e órgano ku tin e outoridat di kual nos konosé komo Budgetrecht.

Di ningun manera nos por aseptá kondishon ku ta mina e outoridat di Parlamento i outonomia di nos Pais. Nos lo no kontribuí ku esaki tampoko pa medio di adaptashon di lei di konsenso òf un lei di konsenso nobo. Pa nos esaki ta un forma di abusu, kaminda nos pais ta den nesesidat pa loke ta un situashon ku mundialmente ta afektá tur hende. Nos Statüt ta e kaminda i e base den kual nos ta funshoná den Reino, kual prinsipionan ta igualdat i rèspèt mutuo. Den pasado na momento ku Kòrsou mester a yuda, Kòrsou a yuda a base boluntario i no a kambio ku ta violá lei di otro pais den Reino. Pues nos lo no bai di akuerdo ku ta bin yudansa a kambio ku ta mina e Budgetrecht di Parlamento.