Parlamentario pa fraccion di AVP, sr Marlon Sneek diahuebs mainta a labora riba algun punto cu pa fraccion di AVP ta masha importante, caminda el a menciona entre otro riba e presion enorme cu ta wordo poni riba Gobernador pa e grupo di bandido cu ta bay goberna e pais.
“Sigur ora cu nos tuma nota ora cu nos mira articulonan cu sra Evelyn Wever Croes a publica un tras di otro, e señora Integridad y cu awe e ta pone tur e articulo- y pensamentonan un banda, aunke e no ta sorprende nos, ya cu tur hende por a scucha e lider di MEP papia di 7, 7 y 7 Minister, pero ya tur hende sa cu su gobierno no ta bay tin 7 Minister mas.
Bon cla Evelyne a mustra cu esun cu kier traha cu MEP tin cu traha cu 7 Minister y ta eynan e mester ta, sino e busca un otro hende pa traha cune, ya cu su persona como formado no ta dobla.
Den otro articulo cu e lider di MEP a publica den pasado na luna di Mei 2017, caminda den e titulo e ta bisa cu: “Aruba mester gobernantenan cu ta bisa loke nan ta haci, y haci loke nan ta bisa.”
Awe nos por mira cu e señora aki no por ni bisa kico e ta bay haci corda pa haci loke e ta bisa.
Nos ta mira un biaha mas con e articulo ta papia di integridad y kico kiermen integridad pa su persona, ya cu ora cu analisa e articulo di Evelyne aki, e ta bisa tambe bon cla cu ‘ley di screening di politiconan, ningun hende bendedo di lotto of catochi por tin investigacion di labamento di placa andando contra nan.
E minister tampoco por tin ningun investigacion di labamento di placa riba dje.
Un Minister politico cu ta wordo investiga pa labamento di placa, no por ta ministeriabel y esaki no ta palabranan di Marlon Sneek pero palbranan di Evelyne Wever Croes den su articulo.
Awe nos ta mira cu informacionnan cu ta bay rond, ta cu locual a Sali di e screeningnan cu a wordo pidi, no ta cos di canta macamba y awe nos ta mira cu no kier respeta e Landsbesluit.
E ley di screening di Minister cu ta un ley iniciativa di mi persona, cu a wordo aproba pa Parlamento, no a wordo promulga caminda dos siman pasa a manda un carta pa Gabinete di Gobernador di con esaki no a tuma luga, y ainda mi no a haya contesta riba esaki.
Loke ta vigente ta e Landsbesluit di 9 di September di 2013 caminda su articulo 6 ta papia palabra cla, cu Gobernador tin un rol importante den loke ta e parti di screening y e parti di aprobacion di loke ta e Ministernan aki.
Nos ta spera manera nos por a mira den nan programa di gobernacion, of intento di programa di gobernacion caminda ta ser bisa bon cla cu pa nan e parti di integriteit van bestuur ta importante y nos ta spera cu na cumpli cu nan palabra manera cu e articulo aki a bisa, cu nos mester di gobernantenan ta bisa loke nan ta bay haci y haci loke nan ta bisa.
Ya nos ta mira cu di parti di e lider honorario di MEP, un atake frontal contra Gobernador cu lo no tin nada di bisa y cu Hulanda no tin nada di bisa y nos por tuma nota di e presion cada bes ta den direccion di gobernador pasobra lo tin algo cu no ta corecto y awe nos por mira Evelyne Wever Croes cu tabata grita cu Aruba no tabatin un lider, e no tin e capacidad di un lider tampoco.
Tambe por tuma nota di un silencio hermetico, no ta papia cu ningun hende y aki aya ta manda un par di whatsapp bisando cu Aruba lo tin un gobierno prome cu siman caba pero no ta informa e pais kico ta pasando y pakico tin tanto tardamento den loke ta nombramento di su Ministernan.
Cada mes nos ta mira e di dos formado kende ta traha e articulonan y ta manda pa medionan di comunicacion cu gobierno ta sali dilanti y ta manda noticia rond cu gobierno ta cla pero e formado oficial cu mester bay bira e lider di nos pais pa e siguiente cuater aña, no tin e capacidad y no ta demostra cu e por lidera tampoco pasobra cada bes un di su partnernan ta Sali su dilanti y bisa cosnan cu mester tuma luga y e formado mes tin cu ripiti.
Cuidou nos cuminsa c’un Gabinete Wever Croes pa despues nos bin caba c’un Gabinete Oduber manera nos ta mira cu e cosnan ta bayendo, pasobra e formado manera un di nan sostenedonan mes a bisa, cu bo por sconde malesa pero bo no por sconde morto.
E ta bisa cu e formado ta hopi zwak y no ta informa pueblo y e falta di transparencia,” Parlamentario Marlon Sneek ta mustra.
