Un poco mas cu dos siman pasa, a informa den conferencia di prensa di Gobierno, cu si cifranan di contagio no baha, ta bini cu medidanan mas severo. Parlamentario Daphne Lejuez ta haya cu e medidanan aki ta necesario. Sin medida mas pisa, e pueblo no ta mira seriedad di e problema di contagionan.
E Parlamentario, kende tin un yiu cu ta cay den grupo di riesgo, ta haya e situacion uno hopi alarmante.
El a splica cu e ta compronde e posicion cu Gobierno ta den dje, unda mester pone den balans e parti di economia, pa e hendenan por pone cuminda riba mesa, y di otro banda e aspecto di salud. “Mi ta compronde cu e ta un decision hopi dificil pa tuma.”
Di otro banda , e ta bisa, si no duna e ehempel door di bini cu medidanan mas severo e poblacion no ta bay sinti e seriedad di e situacion. El a duna e ehempel cu trabou ta sigui y scol tambe. Esaki mientras cu a keda proba cu na pia di trabou tin e contagionan caba. E ora e ta puntra di con e hendenan no por cuminsa traha for di cas. Pakico no duna mas tanto posibel les for di cas. Por laga nan bini un dia cu huiswerk pa henter siman.
Mester busca forma pa limita e contacto y contagio mirando cu awor tin mas di 1600 caso positivo cu ta un cifra alarmante.
