Parlamentario Hato: Kambio di nòmber i eskudo riba nos Sédula

Nos a ta den luna di òktober den kual nos ta selebrá e echo ku dia 10 di òktober 2010 (101010) Kòrsou a haña e status di pais outónomo den reino. Un pais ku su mes gobernashon.

Na momento ku nos pais a haña e status nobo a opta pa laga sierto desaroyonan pa atendé despues. Un di e kosnan ku a laga pa atendé despues ta nos dokumento ofishal di identifikashon esta nos sédula. Tur pais ta duna su siudadanonan un sentido ofishal pa registrá i identifiká nan mes.

Riba nos sédula tantu esnan bieu komo esnan ku ta entregando aktualmente tin e eskudo di Antia Hulandes i e nòmber di Antia Hulandes. Pa evitá konfushon ora presentá ku un identifikashon ofishal ku nòmber di un pais ku ya no ta eksistí, mester kambia nos identifikashon ofishal (sédula) ku nòmber i eskudo di nos mes pais. Sr Hato ta spera sinseramente ku na momento ku selebrá 10 aña di eksistensia ku nos lo por tin nos sédula ku nòmber i eskudo di nos pais.

Den kuadro di esaki sr Hato a hasi e siguiente preguntanan na Minister di Maneho di Gobernashon, Planifikashon i Servisio Públiko. :

  1. Minister por informá Parlamento kon leu ta ku e trabounan pa pone eskudo i nòmber di nos pais riba nos sédula?
  2. Pa ki temporada por spera e kambionan aki?
  3. Tin klaridat kon e nòmber lo aparesé riba nos sédula mirando ku tin biaha ta skibi Kòrsou i den otro kaso ta uza Curaçao?