Parlamentario El Ayoubi ke sa si Kòrsou ta duna pèrmit pa diktadura ‘take over’?

278

E lokual ta pasando na Kòrsou ta algu hopi tristu, bergonsoso i ta un  falta di rèspèt pa pueblo ku ta hasi Kòrsou intrankil i alabes ridíkulo den bista di mundu segun Parlamentario Jeser El Ayoubi.

Realidat ta ku nos mes hendenan ku ta den puestonan determinante ta asina okupá ku nan propósito i ku un aktitut ignorante ta sòru pa e órgano demokrátiko representativo di pueblo o sea Parlamento no funshoná i ta trese un desórden persistente den e orégano di mas haltu di nos sosiedat.

Segun sr.El Ayoubi na momento ku intenshonalmente bo no permití bo órganonan demokrátiko funshoná, nos por papia di diktadura. Segun su konsepto, diktadura por bini di na 2 manera respektivamente di mala fe òf di ignoransia.

Aparentemente a bira un kustumber ku sierto hende ta kere ku ta nan deber òf derechi pa kibra i ‘hijack’ nos demokrasia ora nan ta haña ta bon i na nan kumbinensia.

Den e último 10 añanan di nos pais nos a eksperensiá un Parlamento ku a kometé diferente akto ádemokrátiko inkluso ku a ninga di yama reunion di Parlamento  intenshonalmente ku a obligá e mayoria di e tempu ei di bai reuní den un otro edifisio ku no ta Parlamento.

Tambe nos a mira kon ora un mayoria di Parlamento a kita sosten di gobièrnu e ministernan a sera nan kurpa den fòrti sin kier a sali.

Tres aña pasá e grupo aki tambe kier a sabotiá elekshon ku tambe por keda kategorisá komo otro intento di diktadura.

De fakto tur tres akto por keda kategorisá komo gòlpi di estado. Aktonan bergonsoso ku te dia di awe nos ta karga e konsekuensianan!

Sr. El Ayoubi ta preokupá ku awe Parlamento un biaha mas no por funshoná pasobra 10 miembro ta skohe pa stagna entrada i funshonamentu di un miembro nobo di Parlamento legítimamente i demokrátikamente skohe. Mas i mas Parlamento ta keda pèrdè su prestigio, kalidat i konfiansa sigur mirando ku tantu Gobernador komo korte di hustisia tambe a kai den e asuntu aki.

Pueblo ta defroudá kon diferente di su representantenan ta trata ku otro den Parlamento. Regularmente Parlamento ta bira notisia pa prensa lokal i internashonal den un forma infantil i negativo ku ta reflehá inmadurez, falta di kapasidat, egoista, falta di konfiansa den otro palabra un Parlamento sin òrdu.

Ta kuantu daño mas boso kièr hasi na e pueblo aki?

Ta kuantu mas boso ke defroudá nos pueblo?

Ta boso intenshon pa falta di demokrasia, diktadura i desórden ‘take over’ nos pais?

Esaki ta e normal nobo pa Kòrsou i Parlamento?

Djis wak banda di nos kon otro paisnan bisiña ta kolma di problema i ku miseria pasobra polítikonan ta muchu okupá ku nan propósito ku apénas nan Parlamento ta funshoná te pa kontrolá. 

Sr. El Ayoubi ta enfatisá ku kada Parlamentario mester realisá ku ta algu egoista i hopi grave ora parlamentarionan mes ta mina funshonamentu di Parlamento. Un akto kontra boso huramentu dilanti gobernadó di lo respetá i kumpli ku nos leinan.Kòrsou no ta di boso so pero di nos tur i ta nos tur huntu tin derechi pa disidí den kua direkshon nos ke pa nos pais bai! Kòrsou no meresé mas inseguridat, nos pueblo meresé trankilidat i orden!