Na e momento aki, Aruba ta e unico pais den Reino cu no conoce un proceso di referendum consultativo ancra den ley manera otro paisnan den Reino. E unico caminda cu esaki ta ancra ta den Statuut ora cu kier sali for di Reino cu mester tene referendum. Esaki nifica cu e pueblo di Aruba no tin un manera real pa expresa con e ta sinti cu mester atende un topico. Segun Parlamentario Daphne Lejuez, a yega momento pa pueblo haya su balor real den e sistema democratico cu Aruba ta supone di tin.
“Bo ta tende hopi bes partidonan of Parlamentarionan ta papia di pueblo of na nomber di pueblo, pero con por papia di nan sin realmente dunanan un sistema pa vocifera an mes?”, Parlamentario Lejeuz ta puntra. E Parlamentario ta pone enfasis cu si kier papia di democracia, ta importante pa consulta cu pueblo.
Presupuesto 2020
Recientemente a entrega presupuesto di pais Aruba pa 2020 pa cuminsa trata esaki den Parlamento. For di expresionnan haci door di Gobierno di Aruba, por deduci cu e intencion ta pa e contenido di e presupuesto keda conforme e palabracionnan cu a wordo haci cu Hulanda y CAft, cu e meta pa ora Parlamento trata esaki pa e keda aproba mesora, di tal forma cu e aanwijzing cu tin riba mesa keda elimina.
Plataforma di Consulta Digital
Pa por crea un proceso transparente, consultativo y participativo, parlamentario Daphne Lejuez a bini cu un iniciativa pa crea un plataforma unda cu por laga pueblo tin acceso na e presupuesto den un forma digital. E ta un plataforma unda pueblo na un forma activo y participativo por repasa e documentonan y manda pregunta por medio di un formulario digital pa asina nan por wordo cataloga y inclui den e preguntanan por escrito cu lo ser manda pa gobierno prome cu 13 di Maart 2020.
A crea un formulario por medio di cual por haci pregunta categorisa a base di ministerio, y den caso cu kier haci mas pregunta riba multiple ministerio por semper uza e formulario multiple biaha, of si ta desea por manda tambe un email na [email protected]. Tuma bon nota cu e ta un formulario a base anonimo y ningun informacion personal ta wordo pidi.
Ta invita nos comunidad pa participa na e proceso aki por medio di e formulario cu ta accesible usando e siguiente link: https://www.plataformadiconsulta.com/presupuesto2020/
Participacion Democratico Activo
E Parlamentario ta splica na final cu ora ta trata presupuesto di un pais, ta e momento unda cu Parlamento, aprobando presupuesto, ta duna gobierno autorisacion pa uza fondonan publico, cu ta ser genera cu placa di henter comunidad, den cierto forma. Parlamentario Daphne Lejuez: “Ta importante pa pueblo activamente haci uzo di e oportunidad pa por expresa su interes den e sistema democratico y particularmente na un forma transparente por wak, y duna opinion con fondonan publico lo wordo aloca pa e aña nos dilanti.”
