Parlamentario Cleopa: Víktima pa motibu di situashon malu di nos kareteranan

Sr Cleopa a tumando nota di un situashon ku a trese basta mal kontentu i disgustu serka outomobilistanan ku ta move riba nos kareteranan.

Manera ta konosí den pasado nos tabata Stichting Wegenfonds di kual tabata dispone di fondonan eksklusivamente pa drecha i mantené nos kareteranan. Lástimamente ku esaki no ta e kaso mas i por mira klaramente kon segun tempu nos kareteranan a bai atras i ta den situashon no agradabel pa outomobilistanan.

Nos ta den un temporada di kual tin hopi yobida di áwaseru. Konsekuensia di esaki ta ku bo ta kuminsá haña burakunan den kaminda. Tin di e burakunan ta asina hundu ku na momentu ku un outomobilista pasa den dje e ta kousa daña i asta tin biaha kibra tayo di su vehíkulo. Esaki sigur no ta algu niun tiki agradabel pa un outomobilista ku ta kumpli ku kada aña ta kumpli ku su impuesto di number di outo.

Banda di esei e outomobilista ku su vehíkulo a sufri daña pa motibu di e buraku tin ku kana un kaminda di krus via di e ministerio di Tráfiko, Transporte i Planifikashon Urbano  pa e por keda kla i asta keda ku gastunan ku e mes tin ku kaba di paga. Tur esaki nan ta hinka e outomobilista den un gastu siendo ku esaki no ta falta.

Pa por haña klaridat riba e situashon aki konforme artíkulo 96 di Reglamentu di Òrdu sr Cleopa a hasi e siguiente preguntanan na Minister di Tráfiko, Transporte i Planifikashon Urbano:

  1. Minister ta na altura di e burakunan ku tin riba nos kareteranan?
  2. Minister ta na altura ku dia pa dia mas vehíkulo ta risibí daño pa motibu di esaki?
  3. Minister tin un plan kon ta bai atendé esaki mas pronto ku ta posibel?
  4. Kua ta e prosedura ku un persona ku su vehíkulo a risibí daño tin ku kana?
  5. Ta bèrdat ku e prosedura ta dura muchu?

Minister tin un plan struktural pa por kompartí ku komunidat i kon ta bai implementá pa ku drechamentu di nos karetera?