John F. Kennedy a yega di bisa: “No mira kico bo pais por haci pa bo, sino mira kico abo por haci pa bo pais.” Parlamentario Berlis a expresa cu polis mester a haci su trabao dia cu su gobierno a permiti un crucero cu 5000 pasahero bin exhibi nan locura. Bo mester sa ken bo ta invita na bo cas, ta loke cu lider di partido Curpa, Eric Ras, a expresa den un comunicado di prensa.
“E gobierno cu abo, Berlis, ta sostene, nunca a worry cu nos Cuerpo Policial y awo bo kier bin bisa cu polis no a haci su trabao. Berlis, no bin blame nos polisnan pa no a haci nan trabao. Blame bo gobierno cu pa na cuater ocasion no tabatin opleiding di polis. P’esey awe tin scarsedad di casi 300 polis.
Bo gobierno a permiti e crucero bin Aruba, kizas cu e meta pa pueblo adapta n’e lifestyle cu bo gobierno kier pa pueblo custuma y cu bo no kier papia di dje. Mi conseho na bo Berlis, ta pa bo haci bo trabao como parlamentario y stop di ta ja-knikker. Si bo persona no por saca un man yuda polis, e ora ey no papia mes con polis lo mester haci su trabao, sino enfoca con lo bo mester haci esun di bo. Bo persona no ta funciona como parlamentario y no tin curashi pa sali na defensa di nos pueblo.
Stop di sconde tras di firma encuanto e ley di matrimonio di mesun sexo pasobra e mama di amienda 7 ta partido MEP. Unda bo moral como parlamentario a keda y ainda bo ta forma parti di un partido inmoral.
Nos scolnan ta na werki, edificio di ambtenaarnan ta na werki, KIA ta na werki, nos camindanan ta na werki, nos salubridad ta na werki, Serlimar ta na werki, salud mental ta na werki, Arubahuis na werki, Arubus na werki, Post Aruba na werki, Bubaliplas na werki, Warda di Polis Oranjestad na werki, refineria na werki, e edificionan di gobierno na werki pasobra e gobierno cu bo ta sostene ta na werki.
Unico cos cu bo gobierno a haci den 5 aña ta malgasta placa di pueblo y haci pueblo mas pober cu tur e medidanan cu bo gobierno ta suta pueblo cu’ne. Bo no tabatin e curashi pa para pa pueblo pasobra malgastamento di placa den Fase, loonsubsidie, vacunagate tur boso ta tapa pa pueblo no haya sa e berdad. Universidad di kico partido MEP ta!
E 17 puntonan di e metanan di desaroyo sostenibel cu mester ta implementa pa 2030 tin tur cos aden cu ta bay contra e libertad di nos pueblo. E agenda 2030 ta un agenda comunista cu gobierno di MEP ta forma parti di dje. P’esey no por spera ningun cambio den e gobierno aki. E acuerdonan cu nan mester cumpli cu’ne y un agenda diabolico ta contra e nucleo familiar.
Berlis, bo a bandona bo principio pa bo propio bienestar y ta lubida tur hende. Nos por a lesa cu ta ataca partidonan RAIZ, MAS y Accion21 p’e concepto di ley di matrimonio di mesun sexo. Pakico ta laga partidonan MEP y AVP afo? E 3 partidonan ey hunto no por pasa e ley ey nan so pasobra nan no tin mayoria. P’e ley ta aproba, e 5 parlamentarionan ey mester di minimo 6 mas cu ta sostene e ley aki y nos tur sa cu tin por lo menos 10 mas cu ta di acuerdo cu e ley.
Nos por a scucha tanto e parlamentarionan di MEP y AVP bisa cu nan no ta contra. Si a aproba e geregistreerd partnerschap dia prome di maart 2021 cu 17 parlamentario a vota na fabor anto ta si spera cu e situacion no lo cambia. Dia 8 di September 2016, 11 parlamentario di tanto partido MEP y AVP a vota na fabor di amienda 7. Democracia Real tabata un partido di un asiento. Aki nan a traha e fundeshi pa awe por sigui contrui.
Partido Curpa tanto den eleccion di 2017 y 2021 a spierta pueblo riba e tema aki. Pueblo ta kere cu despues di 7 aña e gobierno di MEP lo bay hala atras? For di 2016 pa awe den 2023 partido MEP a cambia di opinion? Den eleccion di 2017 partido MEP a gaña pueblo pa despues den 2021 claba e puñal den lomba di pueblo. Den e proximo eleccion partido MEP lo bolbe gaña pueblo pa voto pero si partido MEP sigui den gobierno lo no tin cambio.
E unico manera p’e ley aki no pasa ta si gobierno bay cas. E speransa di e pueblo Cristian ta partido Curpa pasobra partido Curpa den gobierno lo para e ley aki y pone e famia na prome luga pasobra nos ta desea di mira prosperidad di nos pueblo. Partido Curpa t’e unico partido cu a para pa e palabra di Dios y Dios su palabra no ta negoshabel. Partido Curpa t’e instrumento di Dios pa sana e tera di Aruba y hunto nos reforma nos isla pa mira e cambio riba nos sila.
