Otro topico cu ta keda di preocupacion pa tanto comunidad como trahadonan ta esun di e situacion di Tra’i Merdia. Varios pregunta a bin dilanti na e Minister concerni sin cu a haya atencion ni contesta. Parlamentario mr. drs. Arthur Dowers di e Fraccion di AVP den Parlamento ta lamenta cu Tra’i Merdia a haya un trato masha arogante for di Minister Rudy Lampe. Esunnan cu a acerca e mandatario pa mehoracion di nan posicion huridico, contrario na locual nan a spera, a haya for di Minister un cambio di trabou como opcion!
Ningun momento e trahadonan di Tra’i merdia a desea di cambia di trabou, mas bien nan a papia di mehoracion den nan posicion y pa nan sorpesa nan a haya nan mes confronta cu e Minister lo a duna nan opcion pa bay y/o cambia for di caminda cu nan ta.
Parlamentario Dowers a bisa, cu como decencia lo mester a duna un splicacion na e trahadonan aki cu porta locual nan ta pidiendo awo no ta posibel, bisanan kico por of no por. En bes di scoge e caminda di dialogo, pa logra haya mas comprension di nan banda, contrario e Minister a scoge pa e caminda di persecucion y confrontacion.
“Absolutamente e no ta bay asina, con ta supone cu lo mester tene e Tra’i Merdia habri? Prome instante Lampe a vocifera cu esaki lo ta un biaha mas un Fake news pero cual a resulta di ta corecto un bes mas”, asina e Parlamentario a vocifera. A descubri e Minister desmantelando e sistema di Tra’i Merdia por completo for di otro, mandando tur hende pa bay traha den enseñansa regular confirmando cu su intencion ta pa disolve Tra’i Merdia.
“Minister Lampe ta carece di honestidad cu pueblo”, segun e ex Minister di Enseñansa. E ta haya cu como e politico resonsabel pa e maneho actual di enseñansa, Minister Lampe mester tabata mas sinsero cu e trahadonan di Tra’i Merdia y mas sincero tambe cu e pueblo. Locual por a constata ta cu Minister Lampe gewoon tabata irita cu e grupo di trahadonan aki a bin exigi nan derecho, e no tabata tin of no kier a duna nan contesta, cual nan merece, a opta pa un acto arogante y grosero pa e grupo aki cu tin hopi aña caba trahando y cumpliendo na bienestar di comunidad dunando “opvang/cuido” na nos muchanan.
Na final Parlamentario Dowers a bisa cu den su opinion e trahadonan di Tra’i Merdia merece un disculpa for di banda di e Minister di enseñansa pa e forma cu e la insulta nan den e ultimo dianan aki.
