Otro cos cu a sorprende e fraccion di AVP grandemente, ta e hecho caminda cu a wordo treci padilanti door di sra. Evelyn Wever-Croes, na un ocasion, el a bay Gobernador pa bay denuncia sr. Otmar Oduber pasobra e lo ta meti den droga. Esey ta den prensa. Y tambe ta asina cu sra. Wever-Croes, a menciona den varios occasion cu droga ta robes, pasobra e ta distrui famia. Pero sa cu sra. Wever-Croes tin custumber di papia un cos y haci otro segun Parlamentario Arthur Dowers. Sra. Wever-Croes tin varios hende cu ta conoci como hendenan liga di baho mundo di droga rond di dje den su partido y tambe awor por mira cu sra. Wever-Croes ta scoge pa forma un Gobierno pa un partido cu ta promove droga. Awor aki tin hopi preocupacion den comunidad. Dowers personalmente a combersa cu cierto miembronan di Cuerpo Policial y a bis’e cu nan no ta compronde mas, ki autoridad moral nan por tin, pa bay atende cu hende cu ta bende droga of cu ta cultiva droga of tin droga den nan posesion cu ta causa un desgracia grandi den e pueblo aki y e Gobierno cu ta sinta awor aki, of cu ta bay sinta, mes ta meti cu hendenan di droga den su partido.
Sra. Wever-Croes tin cu splica pueblo kico segun e ta narcocomplaciente.
Si bo ta bringa caminda cu ta pone placa den presupuesto, pa para traficacion di droga, pa cera hendenan cu ta bende droga. A bringa un lucha contra droga, e ora bo ta narcocomplaciente. Si bo ta bende of uza, stimula, promove, duna yiu di hende droga, pa desgracia nan, e ora bo ta amigo di Evelyn Wever-Croes, e ora bo ta sinta cun’e brasa, den un gobierno pa bo sigui mira con bo por sigui daña yiu di hende.
E pueblo aki merece un splicacion.
Por a tende cu e meneer aki a haya 4000 voto, cual ta impresionante, pero, tabata tin 50 mil voto cu a bisa cu nan si no kier droga. Awo dicon abo ta haya cu e escogencia miho cu tin awor aki ta pa trece e partido di droga den Gobierno. Kier sa e ora ey, con ta bay motiva polis, con ta bay motiva maestronan, con ta bay motiva pastoor, con ta bay motiva na tur e instancianan, trahadonan social cu ta bringa, cu ta mira e dolor cu droga ta causa.
Tin hende ta bin na fraccion di AVP y ta yora cu nan no ta compronde con ta posibel cu e sufrimento cu nan ta pasa aden cu nan yiu of nieto, pa motibo di droga, ta bay bira un pais cu como sifuera cu ta e cos di mas normal cu tin cu por gewoon forma un Gobierno cu hendenan ta promove droga.
Sr. Dowers a splica cu den Cas di Su tata no tin luga pa traidor y tampoco no ta bati kelki cu ta desgracia yiu di hende cu droga. No ta bay tin batimento di kelki y mayoria di su coleganan ta pensa mescos. Cu hendenan cu ta causa daño na hende y bao di capa di formacion di Gobierno ta pretende cu cosnan ta bon.
Dowers ta sigur cu lo bay bin algun siman y luna despues, lo tende e mesun hendenan awe cu ta formando e Gobierno aki, bay gaña cu nan no tabata sa cu asina e cosnan ta. Nan sa masha bon, pasobra tin tur caminda documenta cu nan mes a haci denuncia contra di cierto hendenan cu ta liga na droga, nan a cusa AVP di ta liga na droga y nan a bringa droga, na un forma tenaz. Dowers no ta den droga, no ta interesa pa ta den droga, no kier tin nada di haber cu droga y no por biba cu hendenan cu ta causa desgracia na yiu di hende y haci como si fuera nada no a pasa.
