Loke cu a pasa den fin di siman den Parke Arikok, unda a topa dos persona buscando oro, tin atencion completo di gerencia, mientras cu otro autoridadnan concerni mester sigui cu e proceso di nan banda.
Carl Quandt, vocero di Parke Arikok, a splica cu diadomingo, banda di 11’or di mainta, Parkrangernan a tuma nota di incidente di un persona, kende su atencion a wordo hala na mas di un ocasion. Esaki pa motibo cu e ta drenta e parke cu cierto hermentnan cu por causa daño na naturalesa.
A constata cu entre otro ta laga buraconan cu nan a coba, habri. Diadomingo cu a pasa, esey tabata e caso atrobe, y a bolbe hala su atencion. Na momento cu el a resisti, e manager na warda a tuma pasonan mas avansa, caminda cu a tuma contacto cu autoridadnan local y asina a sigui di parti di parke, pa pone e persona aki riba blacklist di Parke.
Hendenan local
Ta trata di hendenan local. Ta personanan cu tin jaarpas. Nan a drenta parke mainta y na momento cu e rangernan ta haci control, a notifica esaki di biaha na e manager.
Kico nan ta busca
Den e situacion aki, ta bin haya nan den varios area. Nan version ta cu nan ta busca oro. Den e proceso te asina leu, no ta conoci si nan a haya algo.
Regla di parke
Fundacion Parke Nacional Aruba ta esun cu ta encarga pa maneha Parke Nacional Arikok. Ta sigui esaki segun landsbesluit Parke Nacional Arikok y segun articulo 13, no mag di saca ningun mata, ningun animal ni ningun formacion geologico for di Parke.
Fuera di esey parke tin su reglanan caminda cu ta enfatisa cu no mag di core mas cu 20 kilometer pa ora. Hopi biaha esaki sa tin efecto negativo riba nos naturalesa. Adicionalmente e tarifa di conservacion ta uno hopi importante, caminda cu tur bishitante local y internacional tin cu percura pa nan tin e banchi bisti na tur momento y tambe cumpli cu e orarionan di operacion.
Parke Nacional Arikok ta opera for di 8’or di mainta te cu 4’or di atardi. Despues di esaki por drenta te cu 5’or di atardi, tanten cu bo tin un tarifa di conservacion valido. Despues di esaki no ta laga ningun hende drenta parke y mester bandona prome cu bahada di solo.
Un di e motibonan principal ta pa e proteccion di flora y fauna, caminda cu despues di bahada di solo, nan ta hopi mas activo y tambe nan tin mester di nan sosiego.
Entrada pa parke
Pa parke tin dos entrada oficial. Na San Fuego tin e Centro di bishitante y tambe e entrada na Vader Piet, banda di e molinanan di biento. Eynan por paga pa drenta. Pa local e ta 5 florin, pa turista ta 11 dollar. Jaarpas ta 28 florin pa local y pa turista 28 dollar.
E movecion pa localnan a bira mas fuerte caminda cu nan ta busca nan jaarpas, caminda cu ta encurasha esaki. Tambe ta encurasha e comportacion cu ta desea, caminda nan ta bin parke mainta tempran pa cana y disfruta di naturalesa.
Entradanan clandestino
Nan ta consciente cu tin entradanan clandestino y pa esaki ta trahando un plan. E ta mas un plan cu tin cu percura pa e entradanan aki ta sigura, caminda cu personanan no por drenta. Pero tambe cu nan ta wordo informa pa un borchi cu esey no ta e entrada oficial y percura pa tin banchi di conservacion, caminda cu si para eynan pa drenta pa cana, ta ok, tanten cu e tarifa di conservacion of e jaarpas ta valido.
Tin patruyanan di control cu semper t’ey den parke. Nan semper ta hala atencion di personanan cu no tin banchi. Hopi biaha nan ta bin centro di bishitante y si nan ta canando, patruya mes ta trece nan na e centro pa asina cancela e tarifa di conservacion.
Despues di ora
Tin biaha tin eventonan cu por tuma nota riba rednan social. Locual ta e comportacion desea, semper parke ta encurasha personanan pa hike y sigur di esaki prome cu e orarionan di operacion di parke.
Si bo tin bo jaarpas, nan ta mas cu bon bini y despues di e caminata, si no tin e jaarpas ainda, cahera ta habri despues di 8’or, pa por paga esaki.
Pa eventonan pafo di orarionan di operacion, por menciona uno cu nan ta haci cu colaboracion cu Movemento ta Bida, cu ta cuminsa cu un hike pa 6’or di mainta, cual ta pafo di orarionan di operacion di parke, cu nan confirmacion. Eventonan pafo di oranan di parke, no ta haya permiso.
Eventonan di offroad
Segun Quandt, manera cu haya notificacion di eventonan asina cu ta tuma luga den e areanan maneha pa e fundacion, ta tuma contacto cu e organisacion of organisado pa sinta na mesa pa mira kico por regla, mirando cu no ta durante orario di entrada di parke y kier minimalisa e daño cu por causa na naturalesa.
Kico Parke kier pa 2020
Quandt a menciona cu parke ta trahando non stop. Si tin siguridad 24/7, parke tambe ta trahando around the clock pa trece diferente proyecto riba pia. Proyectonan grandi cu sigur e comunidad di Aruba y tur bishitante lo haya notificacion di dje.
Parke ta bay drenta den un fase di renobacion pa ambos edificio. E visitors center y e oficina di parke mes. Esaki lo cuminsa fin di januari, caminda cu lo bay tin varios movecion. Ta pidi cooperacion di publico y prensa pa loke ta movecionnan den centro di bishitante. Adicionalmente lo bay bin cu varios actividad, pa trece tanto bishitantenan local y internacional mas cerca di naturalesa.
Ta ampliando e rutanan di hike den parke. Ta percura pa pone borchi di informacion y tambe e wandelpadden caminda cu si nan kier bay riba nan mes, nan por cana trankil y sigur pa nan por yega bek na nan destino.
Guia
E parkrangernan sigur ta bon informa pa duna guia na e bishitantenan. Pa cualkier reservacion cu ta desea di haci por yama parke na 5851234 y asina por comunica nan cu e departamento concerni pa reservacion of tambe por email na [email protected]. Pone fecha, orario y cuanto persona ta desea di hike y e ora ta comunica cu nan riba e diferente rutanan cu tin y tambe disponibilidad cu rangernan.
Hopi interes di scol
Den e ultimo simannan a haya varios yamada y email di parti di scolnan pa e fechanan cu ta importante. Manera Dia di Betico y Himno di Bandera, periodonan den cual e scolnan kier bishita e parke. Ta haci un suplica pa reserva mas tempran posibel ya cu lo tin mas chens pa acomoda e reservacion.
Si tin cu bay scol pa duna cualkier presentacion, parke ta mas cu contento haci esaki p’asina manda un di e rangernan asisti na esaki.
Historia
Parke tin no solamente historia, sino tur loke ta trata flora y fauna pa e matanan endemico di Aruba, cu tin cu proteha. Si sigui e reglanan aki, sigur cu no solamente nan t’ey pa awor aki, sino pa futuro generacionnan por disfruta di dje.
