Fundacion Parke Nacional Arikok tin varios sesion of anochi informativo riba diferente tema. Segun Sietske van der Wal, manager interino di e parke marino, cu ta resorta bao di Fundacion Parke Nacional Arikok, nan tin diferente charla cu nan ta haci, yama sesion of anochi informativo.
Ta pa e motibo aki mes diahuebs awo, esta dia 14 di october, lo tin un otro sesion informativo den Teresita Center na San Nicolas, di 7:00 pm pa 9:00 pm.
E sesion aki no solamente ta p’e piscadonan den e area, sino tambe pa henter e comunidad cu ta interesa den e parke marino y su desaroyo.
Ta importante pa tur hende forma parti di dje, segun van der Wal. Tur hende cu no por ta den e sesionnan mas cera, lo ta habri pa un ronde di feedback. Cada biaha cu tin resultado a base di e input mientras tanto, ta pidi tur hende duna feedback rib’esey pa asina por tin un bista mas completo y e ta keda un proceso transparente pa tin mas hopi inclusion posibel.
Van der Wal a agrega ya caba nan a bishita basta bario y area. A haya un peticion mas pa Noord. Ta di spera cu pa otro siman por bay Centro di Bario Noord pa haci un sesion mas ey. Ta bay ta un tiki mas enfoca riba e piscadonan, pasobra nan ta interesa pa haya un sesion special pa nan.
Porta lo habri pa 6:30 pm y no mester registra di antemano pa t’ey presente. Sea informa, bin forma parti di e sesion y sa mas di e desaroyo di nos parke marino.
Pa cobertura mas amplio lesa edicion di TREMPAN mañan.
