Pareha Ingles cu a casa aki a yama nan yiu “Aruba”

682

Cu Aruba ta un isla masha gusta cerca hendenan di tur skina di mundo cu ta bishit’e, ta algo bon conoci. Pero e aprecio cu un pareha Ingles tin pa nos pais ta asina grandi, cu Aruba ta hunga un papel principal den e momentonan mas importante di nan bida. Matthew y Natalie Woods no solamente a casa na Aruba 7 aña pasa, pero dia cu nan prome yiu a nace, a dicidi pa dun’e nomber di e luga cu mas nan stima.

Recientemente famia Woods y baby ‘Aruba’ tabata di bishita na Oficina di Turismo (A.T.A.) caminda nan a haya un bonbini caluroso for di e “Chief Marketing Officer”, esta Sanju Luidens-Daryanani.

E encuentro tabata spontaneo y riba iniciativa di e bishitantenan mes. Esaki ta e di cinco bes cu e pareha ta biaha pa Aruba pa vakantie; E prome ocasion tabata na 2007 y for di e momento ey nan a keda encanta y namora di nos isla y su hendenan. Cuater aña despues nan a regresa hunto cu famia y otro sernan keri pa drenta enlace matrimonial.

Natalie a duna luz na nan prome baby diesocho luna pasa y ora e momento spera aki a yega, no tabatin duda den nan mente di cua ta e nomber cu nan kier duna nan yiu. “E ta un baby feliz mescos cu Aruba ta e isla feliz,” e señora a comenta durante su bishita na A.T.A. “Pais Aruba ta nifica hopi cos pa nos, pero principalmente felicidad,” el a añadi. Actualmente e ta na estado di nan di dos yiu y a insinua chistosamente cu nan ta pensando caba riba otro nomber cu ta relaciona tambe cu nos isla.

Di parti di A.T.A., Luidens-Daryanani a expresa gratitud indicando cu ta aprecia enormemente e confiansa y devocion cu nan tin pa nos isla. Ta spera di por sigui conta cu nan bishitanan pa hopi aña mas y asina e di dos generacion di e famia tambe por conoce for di chikito tur e bunitesa y felicidad cu Aruba ta asina conoci p’e.