E pareha deteni awe den oranan di marduga ya caba tabata den bista di autoridadnan pa algun tempo caba.
Ta trata aki di FerdiMar Maduro (35) y su pareha Mary-Ley Croes (29), conoci como Pompe Lonche, kendenan ta biba den Wernetstraat, cu ta keda den vecindario di EPB San Nicolas.
Maduro ta un shopsteward di FTA, ta traha na un compania di transporta placa y ya caba e aña’ki autoridadnan tabatin sospecheo riba dje pa cual a bay busk’e te na su trabou pa interogacion, relaciona cu e caso di atraco riba un joyeria.
Esey a sosode dia 11 di januari ora cu a drenta dos cas, Colombiastraat y esun di dje den Wernetstraat Sinembargo no tabatin suficiente prueba pa want’e. Autoridadnan sinembargo a sigui cu investigacion y a base di tipnan ricibi y mensahenan, a logra haya mas prueba y aprobacion pa detene y tambe su pareha.
Awe el a bay trabou normal, segun por a compronde. Pero yegando eynan el a bisa coleganan cu su pareha a bira malo pa cual el a presta un auto di trabou pa core yega su cas. Pero a resulta cu no ta su pareha tabata sper’e sino miembronan di Team Atraco.
Informacion adicional ricibi ta indica cu ta sospecha cu Maduro y Croes ta envolvi den mas cu un atraco.
Manera vocero policial Lito Lacle a indica aña pasa, mayoria di esnan envolvi den atraco ta Arubiano, kende ta esnan cu ta traha e plan y ta haci uzo di stranheronan pa ehecuta e plan. Esey ta keda demostra den cifra di e cantidad di detenidonan. Den e caso di atraco grandi riba e joyeria a keda demostra atrobe den e sospechosonan deteni, cu atrobe tin Arubiano envolvi.
