E pareha local, Annabelle Quandt, naci dia 20 di augustus 1986, biba na Sero Patrishi # 324 hunto cu Ferdinand Tromp, naci dia 12 di augustus 1990, a purba biaha cu droga ayera pa Merca. Tabata den oranan di merdia cu a gara nan na Aeropuerto, cu un cantidad di droga scondi den maleta, handbag, sapato y mas. Contrario na otro “koerier” nan, esakinan a bay purba pasa algun kilo di heroina y tambe poco marihuana. Te ainda Ministerio Publico no a determina e peso exacto. Ambos ta encarcela pendiente e investigacion andando.
Tendencia nobo: Arubianonan haciendo trabou di “koerier”
Kisas ta pa motibo di nos situacion economico of falta di trabou di parti di nos ciudadanonan. Pero e ultimo lunanan, casi a base diario, ta tende cu koeriernan local a cay na Aeropuerto. Pa un motibo of otro, nos propio hendenan ta sucumbi pa placa y ta opta toch pa “purba nan suerte” dor di purba pasa droga via e sistema riguroso di control na Aeropuerto, pa biaha pa un otro pais.
Arubianonan a dal un trip miyonario
Di acuerdo cu DEA, e ultimo prijs di heroina mas o menos na Merca, ta di US$170.000 pa kilo. Den e caso aki, ta sospecha cu e pareha tabata hibando como 8 kilo di e droga caro aki. Riba su mes e tin un balor e ora ey di US$ 1.360.000,= na Merca cu na Aruba ta casi 2.5 miyon florin. Si nan a pasa cu e droga ey, nan lo a canta bingo y casi por a pasa pa un ganado di lotto. Pero, e suerte no tabata na nan banda y awo lo mester sinta un castigo largo pa e delito criminal aki.
Mester descubri e centro di produccion local
Pa por tin tanto mandamento di droga diariamente asina di Arubianonan pa Europa y pa Merca, e ora mester tin un centro di produccion aki mes of un “patron” cu hopi placa y cu acceso na droga, pa por uza koeriernan local pa hiba su producto pe na e destinacion indica. Hopi biaha e koerier no sa mes di e balor di e producto cu e ta hibando y ta keda contento cu entre 3 pa 5 mil dollar cash, pa por haci e trabou ey. Tin biaha necesidad ta pone hende cay den tentacion pa yega na placa. Pero e reto pa autoridadnan awor ta pa descubri ken ta manda nan, ken ta paga nan, di unda ta prepara e droga, di unda e droga ta yega Aruba.
Kico ta heroina?
Heroina ta un droga sin holo, un opium cu un smaak masha bitter. E ta e 3,6 diacetylester di morfina. Pa su efecto euforico, ta uz’e tambe como un droga recreativo. E ta bin den forma di puiro blanco of cristalnan color bruin, cu ta disolve masha facil den awa. A registra e droga aki na final di siglo 19, desaroya dor di e fabricante di remedi Aleman, esta Bayer cu na 1898 a duna e producto e nomber di “Heroine”, cu despues a bira nomber comun di e droga tambe. E tempo aya tabata promove e remedi aki, como no adictivo, pa uzo di morfina of pa evita tosamento. Mester bisa cu morfina tabata popular e tempo aya pa cual e compania Bayer a purba bin cu un remedi alternativa sin cu e ta adictivo. Pero cu tempo a demostra cu heroina ta mas adictivo cu morfina mes y a hacie e droga mas adictivo na mundo!
Awendia mayoria hende ta inhala e droga aki via “damp”, specialmente e Chinesnan. Ta keinta e puiro riba un pida aluminiumfoil y ta inhala locual ta sali afo via un pipa. Antes tabata uza e droga aki via un hangua pero esey entretanto a stop hopi pa miedo di contagia cu AIDS. Un otro metodo pa su uzo tambe ta simplemente snuif e droga dor di nanishi. Uzadonan ta raporta cu e no ta un experiencia mucho agradabel pero e ta duna e mesun efecto cu e hangua.
Mayoria heroina ta produci na Afghanistan, na aña 2012 tabata na 95% y na 2015 a baha na 66%, pero toch ta mantene su mes como e productor mundial principal di e opium den e ultimo 20 añanan.
Balor di droga a aumenta na Merca durante pandemia
E balor di droga ta varia entre Merca y Europa, pa cual hopi biaha ta purba transporta droga pa Europa pasobra ey e balor ta mas. Asina mes na Merca ultimo tempo, debi na e pandemia, prijs di droga a aumenta pisa. Tin scarsedad di produccion y como cu tin lockdown y casi no tin vuelo, e cantidad di droga cu tin ta bira manera “oro”. Na Merca un liber di Marihuana tabata costa US$800 na maart aña pasa, mientras cu na maart 2020 e mesun cantidad ey costa US$ 1600, pues 55% mas! Prijs di cocaina cu tabata costa US$28000 pa kilo aña pasa, awo a subi na US$34000. Heroina tabata US$50000 pa kilo aña pasa y e aña aki a subi pa US$56000. E droga sintetico, “methamphetamine” tabata costa US$12 pa gram y awo e costa US$15 pa cada gram.
Menos droga riba caya
Drug Enforcement Administration (DEA) di Merca a informa cu na New York a nota un caida significante den cantidad di detencionnan riba caya pa motibo di droga. Na luna di april ultimo, a gara no mas cu 18 kilo di heroina na New York, compara cu 168 kilo den e mesun luna di aña pasa. Den cocaina a gara 5 kilo na april 2020 compara cu 954 kilo na april 2019. Cu droga sintetico tabata 1 kilo e aña aki compara cu 42 aña pasa den e mesun luna. Detencionnan pa motibo di droga ta abou cu 50%, segun un rapport di DEA.
