Dialuna mainta tempran a pidi pa polis bin mesora na MFA Noord. A drenta informacion cu tin dos persona pega den lift ta pidiendo pa auxilio.
Nan lo a bay pa un di e servicionan cu tin di gobierno na MFA Noord y na dado momento, prome nan a saca nan number, pa nan bay ariba, pa nan no subi trapi, a drenta lift. Ora cu nan a drenta lift, a primi boton, pero e lift no ta subi. Tampoco, despues a purba di habri porta, esaki no ta habri.
A primi bel den e lift, pero ningun hende a duna oido. Motibo ta cu tin hopi desordo den e luga, pasobra tin basta hende eyden. A dicidi pa yama AZV, pero e yamada a cay te pa e AZV principal cu ta den Rumbastraat.
Despues a dicidi di yama 100. Nan a yama Polis. Polis a yega y a cuminsa atende cu e personal encarga na MFA na Noord. E persona encarga a yega y a cuminsa busca pa e yabi di e lift. Despues di a haya esaki, hunto cu siguridad y tambe polis, nan a logra habri e lift y asina e pareha a sali.
Nan tabata totalmente trankil. E señora a conta cu e ta sufri di claustrofobia, cual tabata un preocupacion mas grandi. Pero polis, den un forma profesional, cada rato tabata comunica cu e personanan den e lift y asina splica nan pa keda trankil, pasobra yudansa ta na caminda.
Finalmente e yudansa a yega tambe. A pone tambe cu na momento cu a habri e lift, e pareha a sali trankil y a bay sigui despues di a conta polis tur loke a sosode, a subi bay haya nan servicio cu nan tabata pendiente pe. Aunke nan number a pasa caba, toch siguridad a trata pa papia cu esnan cu ta duna e servicio pa mira si por yuda nan despues di a pasa den un experiencia menos agradabel riba un dialuna mainta tempran den e lift di MFA na Noord.
Awor e lift ta keda for di servicio pa un momento. Polis a tuma tur dato di e pareha.
