Parce cu “Turbo Feed Pump” a cay afo na WEB

Ayera nochi pa mas of menos 9:50pm coriente a bay na varios parti di nos isla. No a dura mucho pa NV Elmar a identifica cu e fayo no ta cerca nan, sino mas bien den e central di coriente di WEB Aruba NV mes. Ey a informa un rato despues cu dos boiler (5 y 6) a cay afo, haciendo cu nan produccion a baha drasticamente sin cu por a cumpli mas cu e demanda di NV Elmar, pa cual mester a tira tres liña afo.

Investigacion preliminar ta mustrando den direccion di un fayo cu mester a presenta den e Turbo Feed Pump. Den terminologia tecnico, ta referi cu e pump a “trip”, cu ta un otro forma pa describi cu el a cay for di uzo. Manera un efecto di domino, e falta di produccion di e pump ta crea un otro problema, cu ta traduci su mes den paralisacion di e dos boilernan. Te cu awor, e informa aki ta extraoficial, pasobra ainda WEB Aruba NV no a comunica e motibo di e fayo di ayera nochi cu a laga mas of menos 40% di nos pais den scuridad.

Un experto di e materia a splica nos “na placa chikito” cu ora e pump cay afo, cu automaticamente e motor ta cuminsa draai den “reverse”. Como consecuencia ta haci cu e ta “offload” e awa di e sistema di tankinan cu ta pasa den e boiler y ta haci henter e trayecto seco. Ta e fayo aki ta pone cu e sistema moderno y automatico den cual e boilernan ta funciona awendia, ta pone cu e ta “trip” y asina ta stop di opera.

Asina cu un boiler cay afo, e produccion ta baha y den central di WEB ta haya un alarma cu di un seconde pa otro nan ta produciendo menos coriente pa cumpli cu e demanda cu NV Elmar mester pa por distribui pa henter nos isla. Como cu no ta un, sino dos boiler a trip, cu den central di WEB mester a baha tres liña di entrega cu ta bay pa Elmar, cu ta esun grandi pafo di WEB mes, esun na Tanki Leendert y esun na Pos Abou.

Central di coriente na WEB Aruba NV situa na Balashi. For di aki den ta maneha henter e produccion di coriente y despues entrega na NV Elmar, cu na su turno ta encarga cu distribucion di coriente na clientenan comercial y domestico.

“Kico a sosode no por bisa ainda. E ta den investigacion”, asina un fuente bon na altura di e susedido ayera den WEB a laga nos sa awe. Lo mester tin un splicacion dicon e boiler a hay’e cu e reto aki diripiente, cu a pone cu dos di nan a cay fo’i uzo y asina a hinca henter e planta den un problema serio di cumplimento cu demanda di coriente.

Tecniconan di NV Elmar trahando den e substation situa na Pos Abou, cerca di CITGO Sasakiweg. Segun WEB ta aumenta produccion, nan tabata distribui mas coriente na nan clientenan den e area di Noord.

Den mas of menos dos ora di tempo, den un trabou bon coordina entre tecniconan di WEB Aruba NV y di NV Elmar, a pone cu a reconecta tur e barionan afecta pa e fayo den boiler 5 y 6 na WEB. Specialmente e interupcion den area di HORECA na Palm Beach tabatin su consecuencia pa e restaurantnan cu tabata den pleno operacion,ora cu clientenan a lanta bay sin por come y sin por sigui disfruta di nan anochi.