Diaranson 20 di november ta celebra Dia Internacional di Derecho di Mucha y den cuadro di e fecha aki un biaha mas e team di boluntarionan di nos cuerponan uniforma a yega hunto pa asina celebra cu nos muchanan e fecha aki. Un parada cu e super heroenan cu practicamente ta birando un tradicion awo y ta algo cu e comunidad a acepta cu man habri.
Liberato Hoek na cabes di e proyecto/ idea aki ta duna nos un poco informacion di con e dia a bay. Un grupo mas grandi cu e aña anterior a forma pa sali den un parada di super heroenan na diferente localidad. A pasa varios scol den parti mainta caminda a accentua e presencia di miembronan di Cuerpo di Polis, Brandweer como tambe Ambulance riba dak, indicando cu den cada un di nan ta encontra un super heroe den nos comunidad trahando na bienestar di nos Isla y sigur na proteccion y rescate di nos muchanan.
Despues di oranan di atardi e parada di heroenan a pasa bishita algun Trai Merdia como tambe e kinderafdeling na Hospital. Liberato Hoek ta anhela di por a pasa na tur scol pero lamentablemente no ta posibel pa motibo di orario pero intencion ta pa otro aña complace esnan cu no a haya bishita e biaha aki.
E alegria/ emocion di cada mucha na momento di wak nan super heroe yega nan scol ta e satisfaccion di cada boluntario cu ta forma parti di e dia aki. Muchanan cu ta admira nan super heroenan y ta wak nan na television/film so, a haya oportunidad di encontra cu nan y comparti momentonan inolvidabel. E aña aki un biaha mas un exito rotundo y ta danki na cada un di e boluntarionan/ super heroenan den uniform cu ta haci e fecha uno memorabel.
