Pa exactamente 1:03pm, Stichting Maneho di Aruba su Carnaval (SMAC) a anuncia salida oficial di Carnaval di Mucha Oranjestad. Contrario na e otro paradanan.
E parada e aña aki a pasa riba e mesun ruta cu e parada di hende grandi. Nan a sali for di Entertainment Center na Dakota pa e edificio di ex-DOW den Paardenbaaistraat. Un total di 7 grupo a participa durante e parada, cual por bisa cu tabata sumamente luhoso y creativo, segun publico para na banda.
Un palabra di pabien ta bay na SMAC cu e organisacion di e parada di mucha y tambe na Cuerpo Policial cu a sa di mantene orden y siguridad pa e publico na banda como tambe e participantenan di e parada.
Carnaval ta den su recta final y ainda falta e Parada di mucha na San Nicolas cual lo tuma luga e proximo fin di siman.
E proximo actividadnan di carnaval cu ta pendiente pa e siguiente fin di siman, ta Jouvert Morning cual lo cuminsa pa 3’or di marduga diasabra, 23 di Februari, saliendo for di Joe Laveist Ballpark.
Despues pa 8’or di anochi pa 2’or di marduga, lo bay tin e Lighting Parade cual lo sali for di Entertainment Center te cu ex-DOW.
Diadomingo lo tin e parada di Mucha na San Nicolas, saliendo for di 1’or di merdia y lo culmina den e kimamento di momito na Carnival & Entertainment Village pa 7’or y mey di anochi. Asina ta, marca e dianan aki den bo agenda pa bo no perde ningun di e actividadnan aki.
