Parada di luz na San Nicolas: Mas grandi cu esun di Playa

Polis a programa pa saca Parada di Luz pa 8’or di anochi y esey a sosode tambe.

Pa e ora menciona e 9 gruponan participante den e Parada a cuminsa sali for di banda di Blue Army cu nan casi 4 mil participante.

E ruta cu e parada lo pasa ta: Joe Laveist Ballpark – Pastoor Hendrikstraat – Torenstraat – Caya Dick Cooper – Caya Captain R. Rodger – Lagoweg – Bernhardstraat – Vuylstekestraat – Pastoor Hendrickstraat – Joe Laveist Ballpark.

E secuencia di e gruponan cu nan tema y cantidad di participantenan ta como lo siguiente: Parada ta habri cu Champagne cu e tema Dance for Love and Peace cu 1350 participante y ta e grupo di mas grandi. Nan ta wordo compaña musicalmente pa Tsunami.

E di dos grupo ta TOB cu e banda N”Fuzion cu 1000 participante. Nan tema ta: Parceros. Despues ta bini Infinity Carnival Group cu e tema Wild & & Sexy riba musica di DLS y cu 150 participante. Despues por mira Majestic Carnival Group cu ta conta cu 150 participante cu e tema Sal Away y nan lo baila riba ritmo di Youth Extreme.

Royal Carnival ta e siguiebnte grupo cu 200 participantem, cu musica di NBO y nan tema ta Royal Casa di Papel. Ta sigui Empire Carnival Group cu tin mas o menos 350 participante disfrasa cu e tema Circo Loco y bailando riba ritmo di Buleria. Grupo no. 7 ta OPC cu e tema Soca Panters, 150 participa y cu musica di OREO.

E siguiente ta e grupo Pink4Life cu e tema Soca Demons, cu mas o menos 300 participante y compaña musicalmente pa Le Groove.

Un grupo loco ta ultimo cu ta Chelo Loco cu e tema Faya bo Haya cu mas o menos 10 participante y tin ekipo di sonido. Pa cera e parada tin e last lap.

Segun e schedule traha e prome grupo ta Sali 8’or; pa 9.10 e mester ta Grensweg direccion di Lagoweg; pa 9.45 e mester ta den Lagoweg / Bernhardstraat; pa 10.20 e cabes mester ra den Bernjardstraat / Vuylestekestraat yegando banda di ex Cunucu 10.55. Rond di 12’or e mester ta bahando di Macro direccion di Joe Laveist pa yega final 12:30.