Parada di Flambeu a sali

Algun minuut despues di 8:00pm, Minister Xiomara Ruiz-Maduro a duna inicio na e prome parada di carnaval pa aña 2019 y pa Carnaval 65, cu ta e Fakkeloptocht of tambe Parada di Flambeu. E parada ta un di esunnan di mas grandi cu nunca, cuminsando for di Aruba Entertainment Center na Dakota y pa bay caba na ex edificio di DOW den Paardenbaaistraat. Ta papia di no menos di 15 mil participante e aña aki den e parada.

Di acuerdo cu Shannon Henriquez di SMAC, ta conta cu 12 grupo den parada, lo tin 15 mil participante, ta start 8:00pm y ta spera di por caba rond di 2:00am, manera cu e permiso di Polis ta indica.

Sub Inspector Andy Young, na cabes di e parada di Flambeu a check su holoshi, 8:05pm, ora cu oficialmente a duna inicio na e prome parada di Carnaval 65.

Minister Ruiz, encarga cu e cartera y maneho di Cultura a gradici SMAC y Polis pa nan trabou incansabel durante e periodo largo di carnaval cu apenas a inicia. A corda participantenan y mirones pa gosa e temporada den forma sano.