Pan a resulta “demasiado cayente” awe den Super Food

8062

Awe tardi a bati alarma pa un candela den e panaderia di Super Food na Noord. Con e candela a inicia no ta conoci pero dado momento e candela a expande for di e forno pa e reki di pan, cu mesora nan a core hiba pafo. E empleadonan mes a domina e candela, pero asina mes a pidi presencia di Cuerpo di Bombero pa sigura cu e situacion ta completamente bou control.

Manera ta conoci, Super Food ta un di e supermercadonan mas grandi y cu ta maneha e fluho mas grandi di cliente diariamente. Nan tin nan propio panaderia den cual nan ta horna pan diariamente, mescos cu otro productonan fresco manera bolo, etc. Awe pa motibo di un fayo, e forno a pega na candela cu consecuencia cu mester a paralisa operacion.

Pan cayente….asina cayente…cu a pega candela den Super Food. Situacion ta domina pero a evacua empleado- y clientenan

Posted by 24ora on Thursday, August 13, 2020

Efecto di e candela den un luga cera ta huma, cu a penetra den practicamente henter e edificio y a percura pa panico. Di acuerdo cu nan protocol di siguridad, a evacua tur esunnan paden mientras a cera porta pa no acepta mas cliente. Esey a pone cu e personal entrena y prepara profesionalmente pa  atende cu un situacion di emergencia a activa mesora, a domina e candela internamente y na mes momento garantisa cu empleadonan y clientenan ta sigur.

Awor Bomberonan, experto di seguro hunto cu empleadonan di Super Food lo investiga kico a conduci na e fayo cu a produci e candela cu consecuencia cu huma a drenta den e luga. E caso como tal ta bou investigacion.