Aunke ta un mayoria masha limita di unicamente 11 asiento, un rato pasa Parlamento di Aruba a aproba e proyecto di ley pa corta den salario di empleadonan publico, di Parlamentarionan y di Ministernan. Un total di 9 Parlamentario di oposicion a vota contra e ley aki, pero asina mes e mayoria a conta y e ley a pasa. Parlamentario Michael Lampe no tabata den Parlamento awe pa vota durante e ley.
Mester menciona cu durante e reunion, Parlamentario independiente Daphne Lejuez hunto cu e Fraccion di AVP a presenta un amienda hunto, den cual ta pidi pa mara e condicionnan te cu 31 di december 2020 y no te den infinito. Tambe a boga pa ora kier baha of subi salario di Ministernan, cu mester bin Parlamento prome, pasobra den e ley awo nan mes por subi’e of bah’e sin scucha deseo di e organo mas halto di nos pais. Sinembargo, coalicion a vota contra e amienda y como tal e no a pasa den Parlamento.
Loading…
Reload document 
Open in new tab Den e proyecto di ley di austeridad di salario di empleadonan publico, Parlamentarionan y Ministernan, a vota na fabor pa baha gastonan di Gobierno cu 84 miyon florin. Esey den forma di 36 miyon na salario y beneficionan; 10 miyon di sociaal crisisplan; 11 miyon di goederen en diensten; 28 miyon na subsidionan. Ta estima cu hunto esaki lo traduci su mes den un reduccion di 10.5 miyon florin pa luna.
Ora referi na 36 miyon na salario den Gobierno, ta parti e suma ey den un reduccion di 12.6% di tur empleado publico of “gelijkgestelden” y un reduccion di 25% di salario di Minister y Parlamentarionan. Bou di subsidionan tambe lo baha 12.6% di e salarionan subsidia den fundacion y organisacionnan y lo reduci na mita e pago di “gelijkbedrag” di e pensionadonan di APFA.
Loading…
Ta bon pa aclaria cu ora papia di empleadonan den e status di “gelijkgestelden” di ambtenaarnan, ta referi den su mayoria di e personal den enseñansa. Nan ta 824 trahado na SKOA, 131 na SMOA, 89 na SPCOA y 191 trahado na SEPB pa un total di 1235 docente. Esey no ta tur, ainda Gobierno tin 685 “contractant” trahando den nan servicio sin cu nan ta “ambtenaar” ainda, di cual 153 ta trahando tambe den enseñansa.
Banda di empleadonan publico, e reduccion aki tin consecuencia directo y tin efecto riba salario tambe di empleadonan trahando na Banco Central di Aruba, AZV, Universidad di Aruba, IMSan, Serlimar, Aruba Tourism Authority (ATA) y Sociale Verzekeringsbank (SVb).
Na final, Minister Presidente mr. Evelyn Wever-Croes a bisa den su discurso final cu e ta lamenta masha cu e mester pasa e ley aki pa reduci salario di empleadonan publico. Mar’e e por a duna un dia cu ta aument’e bek, mar’e por ta hasta prome cu december proximo, pero e realidad ta cu no tin un fecha di ki ora Aruba lo sali for di e crisis aki. E prome mandatario a splica cu awor numa ta habri frontera cu Merca, nos destinacion turistico di mas importante, pa mira si esey lo impulsa nos economia. Wever-Croes ta consciente cu no ta tur hende ta di acuerdo cu e decision, pero nos mester e inyeccion aki pa por para bek riba pia, de lo contrario nos lo sigui depende di sosten financiero di Hulanda cu tur e condicionnan cu ta sigui bin.
