No ta algo di awe, sino ta for di algun siman caba tin negociacion andando entre Minister Chris Romero di Transporte & Comunicacion y e director di Arubus, esta Teo Croes. E mandatario ta interesa pa un otro persona ocupa e funcion ey y como tal a puntra Croes pa e acepta un “pakete” y e bandona e puesto. E mesun formula ta aplicando na varios otro instancia, mescos cu e mesun Minister aki a desplega na Meteo tambe cu Drs. Marck Oduber. Sinembargo, di acuerdo cu nos fuentenan, ainda e acuerdo final entre Croes y Romero no ta firma y e ta keto bay na cabes di nos compania nacional di transporte publico. Ta spera si cu den e luna aki di Juni ainda lo firma e acuerdo y asina Arubus lo mester dun’e un “envelop pisa” pa e bandona e puesto y habri caminda pa un amigo di e mandatario, actual miembro di Hunta di Supervision di Arubus mes!
Teo Croes
Teo Croes a bira Director di Arubus desde October 2011, for di tempo di Minister Otmar Oduber. E tabata na timon di creacion di AruTram y AruParking y como tal a surpasa varios reto operacional, cu empleado y hasta retonan financiero den e compania. Prome cu ocupa e puesto di Director di Arubus, Teo Croes tabata den gerencia di Air Aruba, Aserca y Santa Barbara. Hopi aña di su bida el a dedica na e industria di aviacion y tabata masha conoci den e area ey. Arubus no tabata mucho diferente pasobra aunke ambos ta transporte publico, tur dos industria ta cay lanta riba servicio, precisamente locual e semper a busca pa desaroya den tur e companianan cu el a maneha.
Hunta di Supervision di Arubus
Pa por cera un acuerdo cu e Director pa e bandona su puesto, e Minister mester haci uzo di e Hunta di Supervision di Arubus, cu ta su representante den e compania. Nan trabou ta pa supervisa gerencia y garantisa cu ta opera e compania di acuerdo cu e vision di e Gobierno na mando. E Hunta di Supervision ta conta cu Edwin “Eddy” Mohamed como Presidente, mientras cu e miembronan eyden ta Rubinah Bernadina, Charles Vis, Luigi Bergen y Roy “Milton” Harms Jr. Nan awor lo mester acorda un suma cuantioso pa e Director por bay, sin cu ta entama un proceso legal contra e compania cu ya ta debil financieramente, pa asina por acomoda un Director nobo cu tin e mesun pensamento politico cu e Minister.
Conflicto di Interes
Ta parce cu pa Minister Chris Romero, tur cos ta posibel! No tin un liña di kico ta etica y kico ta ilegal. E ta zona hopi logico cu den un Hunta di Supervision di un compania cu ta resorta directamente bou di Bo, cu no por ta posibel pa inclui bo casa den e mesun “board”. E Minister a haci esey sigur dos biaha, tanto na Setar como tambe na Arubus. Si den ambos Directiva ta paga e mesun 2 mil florin pa luna na “gratificatie”, ta nifica cu e Minister a regla pa un aumento di 4 mil florin pa luna den cas. No ta sigur si esaki ta ilegal, pero etico sigur e no ta!
Di Hunta di Supervision pa Director
E number cu mas ta zonando pa e puesto di Director ta di Charles Vis. E ultimo aki ta un ingeniero, a traha algun aña na Valero y ultimo tempo ta un “consultant” na WEB Aruba N.V. E ta un amigo personal di Minister Romero y como tal awor ta riba lista di posibel candidato pa asumi e puesto di Director. No ta conoci si e Minister, di acuerdo cu reglanan di bon gobernacion, lo institui un “Comision di Reclutacion” via Departamento di Recursonan Humano (DRH) of si e lo “hand pick” un persona yega na dje pa e posicion ariba menciona. Esun cu asumi e puesto tin un reto grandi pa desaroya e compania den uno cu ta gana placa y cu por lo menos ta cubri su propio gastonan, explorando tur formulanan comercial, di propaganda riba busnan y tur otro sorto di forma pa logra haya mas entrada pa cubri gastonan subiendo di combustibel, mantencion y di personal.
Arubus
Gobierno di Aruba a funda Arubus dia 28 di September 1979 como nos compania nacional di transporte publico. Cu aña e compania a crece y desaroya, ofreciendo no solamente transporte den bus, sino tambe den tram. Nan ta encarga tambe cu AruParking, den cual nan ta cobra pa parkeer den centro di ciudad y tin e autoridad pa sanciona esunnan cu no ta paga of cu ta staciona robes of den forma ilegal. Arubus ta conta cu 166 empleado, parti entre Arubus (112), AruTram (30) y AruParking (24).
