Pago instantaneo awor ta disponibel na Aruba

Despues di un ‘go-live’ exitoso dia 18 di januari 2020, den cooperacion estrecho cu e banconan comercial, Banco Central di Aruba (BCA), den su funcion di ‘clearing house’, ta anuncia cu un infrastructura di pago instantaneo nobo awor ta disponibel na Aruba. E solucion di pago instantaneo nobo aki yama I-Pago, e marca pa servicionan di pago instantaneo local.

I-Pago ta un paso importante den e modernisacion di e infrastructura di pago di Aruba. Awor por hasi pagonan mes lihe y facil cu placa cash, bahando duracion di transaccion significantemente, reduciendo incertidumbre di pago y di e manera aki promoviendo transparencia.

Historia

Na aña 2016, BCA a invita diferente ‘stakeholder’ pa tende nan punto di bista riba Aruba su infrastructura di pago. Practicamente tur ‘stakeholder’ a expresa nan deseo pa mira mehoracion den e infrastructura di pago, y tabata habri pa modernisacion, automatisacion, y un reduccion den metodonan tradicional di pago. Adicionalmente, BCA a inclui den su plan strategico ‘Bela Yen – Nos Plan Strategico 2016 – 2020’ plannan pa expande BCA su tareanan den e area di pago, pa asina contribui na e modernisacion di e sistema di pago. I-Pago ta awor e prome paso den esaki. 

E implementacion di I-Pago ta encera e cambio di e sistema anterior di ‘Clearing and Settlement’ (Onnet) pa un solucion nobo pa procesa transaccionnan bancario instantaneamente. Desde awor, ta procesa pagonan na florin entre banconan na Aruba den un manera instantaneo, 24 ora pa dia, 7 dia pa siman, henter aña. Cu e introduccion di I-Pago, ta eleva Aruba su infrastructura di pago na un nivel di acuerdo cu e miho  practicanan internacional existente, mehorando asina su eficiencia, confiabilidad y seguridad.

E tarifa

Basa riba su inversionnan y tambe un aproximacion di e volumen di transaccionnan, BCA actualmente ta cobra e banconan comercial un tarifa nobo pa transaccionnan interbancario di acuerdo cu e siguiente structura di prijs: Tur transaccion bou di Afl. 250 ta gratis, mientras cu pa cada transaccion riba Afl. 250 un tarifa di Afl. 0.70 lo wordo cobra. Cu e structura di tarifa aki, BCA kier stimula e uzo di I-Pago. 

Banconan participando cu I-Pago ta:

  • Aruba Bank N.V.
  • Banco di Caribe (Aruba) N.V.
  • Caribbean Mercantile Bank N.V.
  • FirstCaribbean International Bank (Cayman) Limited – Aruba Branch
  • RBC Royal Bank (Aruba) N.V.