Padrastro: Eugene Frans a muri un luna prome caba!

8701

E caso tristo di fayecimento di Rishandroh Anastacia (5) y Roshandrick “Eugene” Frans (3) tin como sospechoso principal e Padrastro Gabriel “Gaby” Martiens. Nos a entreviste den forma exclusivo siman pasa, unda el a conta riba e caso y con e yiunan a fayece. Su defensa ta den man di abogado mr. Drs. Ben Heinze. E investigacion sinembargo no ta cla ainda y keto bay ta interogand’e riba e caso lamentabel aki.

Gaby Martiens a cuminsa e entrevista admitiendo su culpabilidad. El a conta cu e prome caso tabata di e mucha Eugene Frans di 3 aña. Manera dia di awe e ta corda e fecha, tabata un diabierna 27 di october 2017, ora el a sali for di trabou. El a yega cas y a haya e dos muchanan hungando cu azeta y hariña, sushando henter e cas. El a rabia y sota a cay. E yiu chikito, el a mande bay baña pasobra e tabata tur sushi na hariña. Pero e yiu no kier a baña, pa cual den baño el a bolbe haya sla y den e proceso ey e mucha a cay y a dal su cabes na e rand di e potchi di WC.

Consecuentemente, e Padrastro a conta nos cu e mucha a cuminsa bati y a bay flauw. “Ma spanta”, asina el a conta nos den e entrevista. “Ma sacudi’e y segun mi e tabata biniendo bij bek, pasobra su wowonan a medio habri”, el a sigui splica. El a carga e yiu y pone drumi riba cama. El a pensa cu mayan mainta e lo ta miho. Sinembargo, mainta ora a bay den camber, a topa cu e criatura frieu, stijf y sin bida.

E mama a bira histerico den cas, pa cual el a menasa e mama y den e proceso sla a cay tambe. Den nan desesperacion, el a bisa e mama cu e lo “Take care” di dje pero e mester cera su boca. El a hinca e curpa sin bida di Eugene den bahul di su auto y a core bay Warda di San Nicolas cu intencion pa bay entrega e curpa y splica nan locual a sosode. Pero e no tabatin e curashi pa baha di auto. El a start su auto y dal un rond di e drive thru di Burger King, a keda core tras di Warda di Polis, banda di Brandweer, pensando kico pa haci y kico pa bisa Polis.

Ta eynan el a haya un idea pa miho dera e criatura y huy bay biba na Hulanda unda e lo a entrega su mes. Cu e plan ey den mente el a regresa cas, bay coy su hermentnan y anochi lat el a bay na un mondi na Savaneta y a dera e cadaver, cu entretanto a core mas di un dia den bahul di su auto.

Na yoramento el a skirbi un carta di despensa, el a brase e cadaver, a pidi’e despensa y a dere hunto cu su carta di disculpa. Na cas e no por a drumi, su consenshi tabata remorde y asina mes a bay traha. El a pensa di traha te fin di aña, spar poco cen, pa bay biba na Hulanda.

Pa e demas famia, desde 27 di october, ki ora nan yama puntra pa Eugene, tabata bisa nan cu e ta cerca un tanta “pabou”. Esey a keda e excuus pa por lo menos un luna, mientras cu e mucha tabata dera caba. El a keda menasa e mama pa no bisa ningun hende nada di e asunto aki.

Cu e stress ey den mente, casi un luna despues, dia 22 di november, el a yega cas y a topa cu e realidad fastioso cu Rishandroh, e ruman di 5 aña, a kibra e television flatscreen na cas. E acto aki no a bay sin coreccion, pa cual el a conta cu el a rabia hopi y a dal e yiu. E no a specifica con el a matrat’e pero e ta realisa si cu, mescos cu a sosode cu e otro yiu (Eugene), cu esaki tambe a bay flauw.

Pensando kico a sosode cu e otro ruman, el a spanta y kier a haci tur lo posibel pa salba e mucha aki di e slanan cu el a ricibi. Den e proceso e mama a altera y tambe a haya sla. A bay cu e mucha Spoed Eisende Hulp na Hospital, unda a bisa e nursenan cu e mucha a cay na speeltuin. No a dura hopi, dos dia despues, cu el a fayece lamentablemente. Ey e preshon a subi mas ainda, pasobra awor no ta un, sino dos yiu cu ta fayece na su man.

Awor, su defensa ta den man di abogado Mr. Drs. Benny Heinze, kende tabata un Dokter di cas masha popular y hasta un tempo a fungi como Director interino di Departamento di Salud Publico di Aruba. Ora el a baha cu pensioen, el a studia ley na Universidad di Aruba y na november 2014 a huramenta como abogado dilanti Corte Comun di Caribe Hulandes. E ta traha bufete AETHRA Legal situa na Dr. Henriquezstraat # 2 na Playa, hunto cu abogado mr. Peter Mohamed.

“Mi no ta un hende agresivo y tampoco mi ta un abusado di mucha”,

asina el a sigura. El a conta con duro e ta traha pa crianan, pero cu e muchanan ta mal mucha y e ta coriginan ora nan haci cosnan di malcria. A puntre kisas e forma cu e ta agredinan ta mucho pisa, pa cual el a contesta cu kisas esey a pasa.

El a bisa nos cu e ta cooperando cu e investigacion y cu e Polisnan cu tin e caso. El a conta cu ora a detene, e Polisnan no a trate mucho bon. El a accentua cu nan NO a maltrate fisicamente, pero no tabata worry cune, a skupi’e den cel, etc.

Gabi Martiens a accentua na nos cu no ta berdad e storia cu el a droga e muchanan. El a admiti si cu e ta uza droga, specificamente marihuana y cu e ta hume dilanti e muchanan den camber, pero cu nunca el a laga nan hume. Riba nos pregunta dicon a haya marihuana den nan sanger, el a contesta cu e no sa, pero e nunca a duna nan si. Kisas nan ta “secondhand smoker”. El a reitera cu marihuana ta bon, e ta algo natural.

E detenido a conta Fiscal cu e problema di droga ta serio, pasobra awor cu e ta den KIA, nan ta bende cocaina manera nada. Bo por haya cuanto cu ta, ki ora cu ta.

Na final Gaby Martiens, cu a admiti di ta e culpabel pa morto di ambos criatura, tabata masha interesa con e entiero a bay y a lamenta cu nan no a dune e chens pa e atende. El a puntra nos si e tata tabata presente y con el a actua. Ey el a bisa cu e tata nunca a worry cu su yiunan y awo ta haci drama. Tambe el a puntra si hopi hende ta rabia cune awor y con leu e noticia a bay, por ehempel si e noticia a yega Hulanda.

El a finalisa e entrevista bisando cu e no a meen loke a pasa. E ta considera su mes un producto di nos mesun sociedad. E ta haya su mes un bon tata, cu ta corigi e yiunan pero cu e biaha aki e man tabata mucho pisa. Na final el a subraya cu e no ta considera su mes un homber cu mecha cortico, pasobra normal e tin hopi pasenshi, pero ya…..e ultimo biahanan aki, e muchanan a lagami flip!