Parokia San Juan Pablo II ta celebra su di 5 aniversario

Ta manera ayera pastoor Santiago ta anima pastoor Jan pa hasi Kapel Monte Calvario un Parokia independiente, un Parokia ariba su mes, mirando cu tanto Parokia San Francisco di Asis como Parokia Santa Anna a crece bira hopi grandi.

Pastoor Jan a forma un comicion pa hasi e trabownan necesario, skirbi y manda un carta di peticion pa Obispo Luis A. Secco cu argumentonan valido (poblacion a crece, bario di Tanki Leendert tin su schoolnan, centro di bario, gruponan di oracion y Kapel semper ta yen tambe cu turistanan) pa transforma Kapel Monte Calvario den un Parokia independiente.

Parokia Santa Anna ta dispuesto pa contribui financieramento cu construccion di Cas Parokial/Pastoral pa Parokia nobo na Tanki Leendert. Comicion a duna di conoce cu nan ta desea pa pastoor Jan bira pastoor di Parokia nobo mirando su contribucion y entusiasmo pa cu e Parokia nobo. Pastoor Jan lo mester keda biba y yuda na Parokia di Noord mirando cu no tin Cas Parokial/Pastoral na Tanki Leendert ainda. Tambe e orario nan di misa lo wordo ahusta.

A pensa ariba diferente nomber pa Parokia Nobo pero mirando cu Papa Juan Pablo II lo a wordo canoniza dia 27 april 2014 y lo bira San Juan Pablo II a skohe pa tuma e nomber aki pa e Parokia nobo y ta desea pa hasi e apertura ariba e fecha natalicio di e Patrono cual ta 18 mei. Y pa es motibo aki Parokia San Juan Pablo II, Tanki Leendert, a keda inaugura dia 18 di mei 2014. Y pa e nomber Monte Calvario no bai perdi a pensa pa yama e Sala Parokial “Sala Monte Calvario”. E carta a keda entrega na Obispo y durante reunion di clero na Aruba dia 15 november 2013 a keda dicidi unanimamente cu lo transforma Kapel Monte Calvario pa Parokia San Juan Pablo II.

Pa a logra e apertura ariba 18 di mei 2014 mester a traha duro mirando cu e tempo tawata cortico. Danki na tur cu di un of otro manera a yuda pa drecha y verf e edificio pa e dia special aki. E cambio aki a trece cune cu Parokia nobo no tawata tin tur cos necesario pa funciona manera un misa. Pero danki na Parokia di Santa Anna, mama di nos Parokia San Juan Pablo II, pa fia nos boso ministernan Eucaristico, lector nan y loke tawata mester pa celebra Santa Misa te ora Parokia nobo mes a logra organisa tur lo necesario. Mientras cu tawata organisa Parokia San Juan Pablo II, tawata pensa tambe pa construi un Cas Parokial/Pastoral. Despues di tur trabownan di preparacion construccion a cuminsa na oktober 2017. Danki na Parokia Santa Anna, diferente fundraising (koffiemorgen, Bingo, Soep Festival, rifa etc. y sin lubida tur nos bienechornan) e projecto a keda cla na oktober 2018. Dia 11 november 2018 pastoor Jan a muda pa Cas Pastoral Tanki Leendert. Ainda cas no ta completamente cla falta algun cosnan chikito pa finalisa. Tambe falta cura pero esey mester warda te ora haya forsa financiero atrobe. Mientrastanto e Cas Parokial/Pastoral ta wordo bon usa.

Pastoor Jan, pastoor di Parokia San Juan Pablo II, Tanki Leendert, kier gradici Obispo Luis A. Secco, clero completo especialmente pastoor Santiago di Parokia Santa Anna, su Congregacion San Miguel Arcangel y tur parokiano y bienechornan pa contribui na e realisacion di e bunita projecto aki. Danki pa e confiansa deposita den su persona pa guia e Parokia nobo y cu por sigui conta cu boso apoyo. Actualmente na Archivo Nacional Aruba (ARA) tin un exposicion “Presencia y influencia di clero Hulandes na Aruba” caminda por haya e historia completo y mas detaya.