Corte awe a atende un caso special, pa un disputa di honorario (cobransa) di abogado na cliente. Ta trata aki di un diferencia di opinion relaciona cu e famoso caso di oro di e conocido “Toro”. Den pasado abogado mr. Helen Lejuez a defende y parce cu e lo a cobra sumanan adicional cu e cliente no kier paga. Entretanto el a hinca e caso (defensa) den man di e conocido abogado, mr. Pepi Sulvaran di Corsou. Consecuentemente abogado Lejuez a entama un caso na Corsou contra Sulvaran cu el a perde y awor Sulvaran a entama un caso bek contra dje na Aruba, na Corte di Supervision di Abogacia (Raad van Toezicht voor de Advocatuur). Cu e caso aki, abogado mr. Helen Lejuez ta core risico di perde su licencia di abogado, si acaso haya cu el a faya den su forma di atende cu e cliente.

No ta prome biaha cu abogado mr. Helen Lejuez ta haya su mes envolvi den un tipo di caso asina, den cual ta demand’e pa su cobransanan na cliente. Hopi aña pasa el a yega di hay’e den mesun tipo di scenario cu e comerciante Betto Arends. E tempo ey Lejuez a perde e caso y mester a paga Arends un suma cuantioso bek. Awor aki, despues di tanto aña, e ta para na e mesun crusada, den cual un cliente di dje ta demandand’e pa su forma di cobra y su forma di atende cu cliente. E demanda lo por nifica final di su carera como abogado profesional, siendo miembro di Orde van Advocaten.

Abogado mr. Helen Lejuez confrontando keho pisa contra dje

Abogado mr. Helen Lejuez confrontando keho pisa contra dje

Posted by 24ora on Wednesday, June 26, 2019

Raad van Toezicht voor de Advocatuur

E “Raad van Toezicht” ta consisti di un Hues y dos Abogado. Prome ta duna esun cu ta entrega un demanda e oportunidad pa haci su keho riba papel, mientras cu e abogado envolvi ta haya oportunidad tambe pa defende su mes riba papel. A corto plaso ta sigui un sesion den sala di Corte, den cual ambos partido por defende nan mes personalmente y eventualmente splica nan mes miho personalmente. Ambos partido por haya sosten di un abogado den e caso aki. De un periodo relativamente corto e Raad van Toezicht mester tuma un decision.

Si e Raad van Toezicht ta di opinion cu e Abogado envolvi a faya den su forma di atende e cliente, por tuma 4 diferente sancion:

  • Un aviso (eenvoudige waarschuwing)
  • Un reprimenda (berisping)
  • Suspende trabou di e abogado pa un maximo di 1 aña
  • Scrap e abogado for di e “tableau”

Den e prome dos scenarionan, e Abogado lo por sigui eherce su trabou. Si suspende e Abogado, ta nifica cu durante e temporada ey e no tin mag di traha, tampoco e por participa na e reunion di miembronan di Orden di Abogado. Ora scrap un Abogado for di e “Tableau” nifica cu e ta perde su titulo di Abogado y cu nunca mas e por eherce dicho funcion. Den caso cu Raad van Toezicht haya cu e Abogado a cobra un cliente demasiado, nan mes lo dicidi cuanto si ta husto pa cobra bou e circunstancianan ey.

Si ambos partido no keda contento cu e sentencia di Raad van Toezicht, tin posibilidad pa apela den tres siman na Raad van Appèl. E Raad ey ta consisti di Presidente di Corte Comun di Caribe Hulandes, hunto cu dos Abogado cu hopi aña di experencia. E Presidente di Corte por apunta un otro Hues experencia como su reemplasante.

Abogadonan cu a perde nan licencia ultimo añanan

Na Aruba ultimo añanan varios abogado a perde nan licencia dor di varios tipo di practicanan dudoso of ilegal cu cliente. Asina cu Raad van Toezicht di abogadonan sinti cu tin transaccionnan no etico, ta keha e abogado concerni y ta laga e decision den man di un Corte forma pa un Hues y por lo menos dos abogado. Den pasado abogado Edwin Ras, Charles van Esh y ultimamente hasta Edwin Duijneveld a perde nan licencia. Den un caso asina e abogadonan aki por sigui di ta hurista y lo por sigui conseha clientenan pero no por bringa caso den Corte mas. Siendo miembro di Orden di Abogadonan ta duna cierto beneficionan cu e ora ey Bo lo perde ora scrap bo for di e “tableau”.

Abogado mr. Pepi Sulvaran di Corsou yegando edificio di Corte den compania di su cliente Toro Rodriguez. Nan a presenta awe dilanti Raad van Toezicht voor de Advocatuur. E comision aki ta fungi como e “Tuchtrechter” pa abogadonan.

E demanda contra mr. Helen Lejuez

Kico exactamente abogado Lejuez a haci den e caso aki cu awor tin’e den e caso di demanda no ta completamente conoci na nos. Despues di tratamento di e caso awe, cu a dura algun ora largo, e abogado a opta pa no contesta preguntanan di prensa. Abogado mr. Pepi Sulvaran di Corsou a bin pa representa su cliente Toro Rodriguez den e demanda aki. Ey a repasa e hechonan y pidi Raad van Toezicht pa evalua e caso, analisa e cobransanan y e forma con a atende cu e cliente aki, den cual ta mustra cu a purba probecha di e situacion cu a hay’e aden cu Ministerio Publico pa cobra mas na honorario posibel.

E caso di oro di Toro mester warda pa mas oro

E abogado di Corsou no kier a contesta ningun pregunta pafor di sala di Corte, pa cual a puntra mas riba posibel perdemento di bara di oro. Riba esey tampoco el a prefera pa no duna contesta y a limita na bisa pa puntra Ministerio Publico di esey pasobra e no sa di nada. A puntr’e si e ta haya normal cu mas di un aña a transcuri y ainda Fiscal no tin fin di presenta e caso dilanti un Hues y el a bisa cu e tambe ta haya cu ta durando demasiado pero a conseha pa check cu Fiscal dicon e caso ta tardando tanto. A bisa e abogado di Corsou cu aki na Aruba “caya ta papia” cu a perde un of mas bara di oro y cu e caso tin chens di rementa den cara di Ministerio Publico y di Gobierno di Aruba. E abogado a subi auto y bisa cu e no por contesta e preguntanan aki relaciona cu rumornan persistente coriendo den gangnan di Polis mes, cu ta wardando pa e caso aki bin padilanti, maneha pa e recherchenan elite di Recherche Samenwerkingsteam (RST).

No a pone fecha pa decision ainda

No tin un fecha definitivo ainda pa bin un decision den e caso di Raad van Toezicht contra abogado mr. Helen Lejuez pa cual nos lo sigui e caso aki masha di cerca. Abogado Lejuez tin un trayectoria largo den husticia, tanto como abogado y un tempo hasta como Procurador General di nos pais. Lo ta masha di lamenta pa termina su carera asina cu un mancha scur riba su nomber y su carera den abogacia.

Comments

comments