Un informe ricibi ta mustra cu diaranson marduga tabatin un accidente na Tanki Leendert, unda cu e daño cu tabata mustra chikito a resulta toch grandi.
Un auto a dal den e propiedad di Stern na Tanki Leendert. Segun por a compronde di informacion haya na e sitio, e chauffeur biniendo di Paradera dado momento a hay’e obliga pa hala na banda robes ora cu un otro vehiculo a subi caminda su dilanti.
Den e maniobra pa no dal den e auto, e chauffeur a perde control y a bay pega den un pilar di e cura di Stern. Na e sitio por a mira cu Polisnan a test e chauffeur, kende a admiti cu el a dal poco drinks.
A resulta cu el a supla net un tiki mas cu e limite permiti y pa sali di tur duda Polis a detene y hib’e na warda pa pasa e test di alcohol mas sigur.
Afortunadamente ningun hende a resulta herida. Dos vehiculo cu tabata staciona den e cura tambe a ricibi daño ora parti di e pilar y un porta di hero a cay riba nan.
