Aruba ta conta c’un sistema di cuido medico hopi moderno den tur sentido pero a pesar di esaki tin desaroyonan cu ta keda un problema ya cu e ayudo of sosten medico, no tur ora ta cana manera mester ta y esaki ta trece problemanan serio pa hopi hende malo.
Un di e problemanan serio ta e falta di suficiente neurologo caminda tin cu señala cu ta increibel cu e isla aki ta conta c’un solo neurologo kende tin cu atende miles di ciudadano cu tin problemanan di salud mental, problema di sistema nervioso di e medula espinal y musculonan di e hende.
Un pashent ta bishita un neurologo na momento cu e tin problema di entre otro dolor di cabes, ora cu e perde forsa di un of otro musculo, ta mira dobel of si e pashent problema cu su canamento y un neurologo ta trata otro malesanan tambe manera migraine, epilepsia, malesa di Parkinson y tambe esunnan cu ta sufri di e asina yama ‘carpaal tunnel syndroom”.
Na Aruba tin miles di pashent cu ta sufri di un di e malesanan aki pero e problema mas serio ta cu e isla ta conta c’un solo neurologo mientras cu e ta haya asistencia di un neurologo kende ta specialisa den atende cu dolornan c’un pashent ta sinti.
Sinembargo e specialista aki no ta un neurologo cu por yuda den un sentido mas general y eynan e problema ta sinta ya cu e falta di tin mas specialista asina den servicio, ta pone cu hopi pashent tin cu warda te ora cu tin cupo pa wordo atende. Y esaki por dura algun luna.
Eynan tin un periodo di warda cu ta core di tres pa cuater luna y hasta por tuma mas tempo y tur esaki lo tin consecuencia pa salud di e pashentnan cu no por haya alivio pa loke nan ta sufri di dje.
Ta un hecho tambe cu na Europa na e momentonan aki, tin un scarsedad preocupante di e cantidad di specialistanan den neurologia y a pesar cu SvB a dicidi di inverti den dos studiante riba tereno di neurologia, door di financia nan estudio, no por kita di e realidad cu no ta awe pa mañan nan lo ta na Aruba. E specialisacion aki ta encera un estudio di seis aña adicional.
Pues un solucion a corto plaso no ta na bista na e momentonan aki y esaki lo nifica cu e problema lo bira mas grandi loke por bolbe bira un carga financiero pisa den futuro pa SVb cu lo tin cu manda pashentnan den exterior pa haya ayudo.
Otro solucion lo por bira pa busca e tipo di specialistanan aki for di Colombia of otro pais den Sur America y tambe Centro America pero esaki ta wordo dificulta pa e asunto di AruBig cu no ta permiti e specialistanan aki traha na Aruba.
E situacion ta hopi delicado ya cu tin pashentnan cu a ser confronta cu situacionnan serio cu nan salud pa falta di mas specialista y hasta lo por tin casonan caminda tin hende a fayece pa falta di asistencia medico specialisa riba e tereno aki.
Ta un hecho cu na Hulanda practicamente no por haya ningun specialista riba tereno di neurologia ya cu na Hulanda mes tin un scarsedad formal di e tipo di specialistanan aki.
Hopi ta ser papia y discuti riba e asunto di ‘salud mental’ aki na Aruba caminda tin hopi hende, tanto hende grandi como hobennan, cu ta confronta c’un lucha formal contra di salud mental y nan no ta ricibi e ayudo adecuado pa nan por sali di e situacion penoso aki.
Hopi mayor aki na Aruba ta haya nan mes cu un of mas miembro di famia cu tin un problema di salud mental pero no tin un sistema di sosten of di control pa yuda e hendenan aki y alivia e peso grandi cu nan ta cargando den nan sistema nervioso y pa cual pa algun tempo caba, no tin suficiente na Aruba pa alivia e situacionnan aki.
