Pa falta di preferencia na crusada di Springfield dos auto a accidenta

683

Diahuebs pa mas of menos 8:40PM a sosode un accidente na e crusada di Springfield entre un Hyundai H10 color blanco y un Honda blauw scur. E Hyundai tabata bin for di Bernhardstraat y tabata bay direccion pabou, mientras e Honda tabata bin for di Lagoweg cu direccion Noord.

Yegando e crusada aki chauffeur di e Honda no a duna preferencia na e Hyundai. Consecuentemente e van a dal fuerte na banda drechi di e Honda. Door di e impacto fuerte aki, e Honda a termina algun meter panort di e crusada. Polis a presenta na e sitio pa atende cu e accidente aki. Roadservice tambe a presenta na e sitio pa tuma declaracion di ambos partido.

E persona cu tabata den e Hyundai tabata keha di tin basta dolor, p’esey a pidi asistencia di ambulance. Paramediconan a controla e persona, pero no a transporte pa hospital pasobra e persona no tabata desea esaki. Bumper di e van a ranca completamente, mientras cu e taira na banda drechi di e Honda a dobla. Polis a ripara cu e plachi number di e Honda tabata mita di 2019 y a pidi presencia di takelwagen pa bay cu e auto.