Otro luna ta premira dobel cantidad di turista pa Aruba

Den e ultimo siman di juli, e prome luna di reapertura pa turismo internacional, Aruba Tourism Authority (ATA) a proyecta 7000 turista. Pero awo ta ilustra cu nos a surpasa 11.000 turista caba. Lo cera luna di juli cu dobel di e 7000 turista cu a anticipa y esey kiermen un recuperacion p’e luna compara cu aña pasa di 14% na luga di 7%. Segun Ronella Tjin Asjoe-Croes, CEO di ATA, lo por cera e luna mas o menos cu 14 mil bishitante den e prome luna di reapertura y esaki ta dos biaha mas hopi di loke ATA a proyecta.

ATA a bin cu proyeccion pa tur luna y ta yega na un posibel resultado pa fin di aña. Tur esaki ta mara na e impacto economico cu nan a premira y conforme con e lunanan ta bay, unda lo ahusta esaki. El a sigui bisa, cu ta mira hopi oportunidad basa riba con e mercadonan ta move y comportacion di turista. ATA ta premira pa luna di augustus entre 19 mil y 25 mil turista.

Ta kere cu den luna di augustus Aruba lo haya dobel cantidad di turista compara cu juli, cu ta 14 mil turista. Tur esaki ta segun loke ATA ta premira, pero si luna di augustus ta mas manera juli, lo ahusta e calculacionnan pa e siguiente lunanan cu ta sigui. ATA ta keda cauteloso, pasobra e proyeccionnan por move y bay abou. Tin hopi desaroyo, pero pa luna di augustus lo mantene e proyeccion aki.

Tjin Asjoe-Croes a bisa cu a yega na esaki a base di yegada aereo pa luna di augustus, grado di ocupacion y a hunga cu e cifra pa yega na e cantidad di 19 mil pa 25 mil turista. Otro identidad clave pa turismo, AHATA a indica kico nan ta mira pa loke ta trata e ocupacion pa hotelnan pa luna di juli. Esaki tabata di 9% y pa augustus AHATA a bisa esaki lo por ta di 18%.