Otro cifra record di bishitantenan crucero a yega Aruba

Gerencia di Aruba Ports Authority (APA) cu hopi orguyo a anuncia cu tres barco crucero grandi a dorna waf di Oranjestad awe, percurando pa trece un cifra record di bishitantenan pa Aruba. Mas cu 11 mil pasahero, combina cu mas di 4 mil tripulante di e barconan, a trece un bista alegre den centro di ciudad, su alrededor y rond Aruba pa esunnan cu a haci uzo di e diferente tournan.

Carnival Horizon a yega cu 4468 pasahero mas 1439 tripulante; Regal Princess cu 3005 pasahero y 1372 tripulante y Carnival Breeze cu 3733 pasahero abordo y mas di 1373 miembro di tripulacion. E movecion di mas cu 11 mil bishitante den y pafo di Oranjestad, a percura pa un bon inyeccion den e economia. 

E cambio den maneho di turismo crucero ta cu cada biaha APA ta logra trece barconan nobo pero tambe barconan mas grandi. Asina ya ayera Aruba a ricibi un mega crucero MSC MERAVIGLIA (den su prome bishita) cu a trece rond di 4240 pasahero mas 1,613 tripulante.

Aña pasa Aruba a ricibi 334 barco cu a trece un poco mas cu 815 mil turista y tambe 289 mil miembro di tripulacion. Te cu awo Aruba a ricibi 243 barco cu a trece 608.728 pasahero, compara cu e cifranan di aña pasa di e mesun periodo cu tabata di 623.317 pasahero.

Den loke ta resta di e aña aki, e cantidad di bishitantenan crucero lo subi compara cu e prome parti di 2019 mirando cu esaki ta e temporada halto di crucero cu a caba di cuminsa luna pasa. Obviamente Aruba ta keda un destinacion atractivo cerca e biaheronan crucero.

Pa algun aña caba por mira cu e peticion pa Aruba no ta baha. Otro prueba ta cu companianan crucero ta cuminsa uza barconan mas grandi riba e rutanan cu ta inclui Aruba, cu pa nos ta nifica un miho desaroyo.

Locual cu tambe a hunga un rol importante ta e sinergia entre APA, ATA (Aruba Tourism Authority) y Ministerio di Turismo di Dangui Oduber pa pone cabes y recursonan hunto y traha na desaroyo di turismo en general. E cantidad di turistanan crucero riba un solo dia ta prueba di e lasonan estrecho cu tin entre e stakeholdernan.