Diasabra despues di 2or di marduga, Polis a bay un accidente na Ponton, specificamente den Sisalstraat. Ta trata aki di un auto cu a bolter den un caya habita. E accidente a sosode di un forma masha straño.
Na yegada di e patruya a bin topa cu un Hyundai Getz color preto riba dak cu su cuater wiel pa laira. A cuminsa investiga ta con e auto a bolter.
E Getz a dal den un Kia Sportage color cora para banda di acera. E Getz tabata biniendo for di Caya Maguey direccion pariba y pa un motibo of otro e Getz a bay lora na su man robes drenta den Sisalstraat.
Asina a dal den e Kia Sportage cu tabata para riba e acera y bolter. E chauffeur di e Getz a bandona e sitio y laga e auto su so riba caminda benta.
Lucho Towing a presenta na e sitio pa asina bolter e auto riba su wielnan y pa despues hiba e auto pa warda di Balashi pa mas investigacion. Un chauffeur cu bandona un sitio di accidente ta castigabel pa ley. E mester keda te ora cu Polis of Forensys yega na e sitio pa atende cune.
