Parlamentario Otmar Oduber den su conferencia di prensa dialuna ultimo, a sugeri na gabinete AVP-FUTURO cu fraccion di PPA lo bay facilita trabou di Minister di Turismo, esta Wendrick Cicilia, ora cu su persona presenta un ley den cual lo boga pa e fondo di TPEF, wordo adapta.
Oduber a mustra cu durante tratamento di presupuesto 2025 diabierna siman pasa, fraccion di PPA cu ta su persona, a entrega un ‘amienda’ pa di e forma aki crea fondo cu cual lo por re-negocia e erfpacht cu a ser duna caba, pa purba cumpra over pa di e forma aki para e cantidad di construccion di camber di hotel den futuro.
Parlamentario Oduber a mustra cu tin un 700 camber di hotel cu ta den proceso di bay wordo construi apesar cu tin varios rapport cu a indica caba cu e presion di infrastructura cu e proyectonan aki lo trece cu ne.
E hecho cu e lider di PPA a sugeri cu su amienda of vision lo por facilita Minister mr. Wendrick Cicilia ta mustra den cierto forma cu e titular di turismo, lo ta carece di suficiente experiencia riba tereno di turismo loke si ta asina, ta un sugerencia sin base.
Aki tin cu mustra cu Parlamentario Otmar Oduber a tene su conferencia di prensa dialuna mainta 31 di maart, mientras cu e gobierno di coalicion nobo, apenas 58 ora despues cu gobierno nobo a caba di huramenta y no a divulga ainda su programa di gobernacion.
Loke ta hunga un rol den henter e tipo di politica aki, ta cu e lider di PPA durante di campaña electoral na 2024, ta un di e politiconan cu a haci un apelacion riba votadonan, pa kibra cu e politica tradicionalista, ya cu ta momento pa un politica nobo lanta cabes.
Minister Wendrick Cicilia ta e generacion nobo cu tin cu percura pa e politica nobo aki, mientras cu Parlamentario Otmar Oduber, ta forma parti di e politica bieu, mas ainda ora cu e referi na un documento cu el a considera un “masterplan” pa turismo cu a carga e titulo di “Winning the Future.”
Oduber ta informa cu e documento aki a ser presenta pa su persona na 2011, cu ta casi 14 aña pasa cual tabata un plan cu mester a percura pa cambionan den maneho di turismo di Aruba, riba un periodo di dies aña.
E actual Minister di Turismo ta Wendrick Cicilia cu realmente ta forma parti di un grupo di politiconan hoben cu mester bira e lidernan di futuro y como candidato no 1 riba lista di AVP, Wendrick a logra un total di 4894 voto personal mientras cu Otmar Oduber mes a logra 2419 voto di sosten.
Loke ta hunga un rol tambe relaciona u expresionnan di Parlamentario Otmar Oduber, ta cu mientras cu ta papiando di un proceso pa gobierno cumpra bek terenonan cu lo por ta destina pa construccion di mas hotel y asina cumpli cu deseo di hopi hende pa no construi mas hotel.
Di otro banda su persona no mester lubida cu e desaroyo cu tin na e momentonan aki den turismo, el a forma parti di e desaroyo y ningun momento a anticipa e situacionnan cu tin actualmente, ya cu el a huramenta na 2009 como Minister di Turismo, Transporte y Trabou.
El a sigui un di dos periodo como titular di turismo for di 2013 te cu 2016 ora cu el a dicidi di kibra tur laso cu AVP y a bandona gabinete Mike Eman II.
E parti mas interesante sinembargo di e carera politico di Otmar Oduber ta cu na luna di november 2017 te cu 12 december di 2019, e lider di PPA a carga responsabilidad di “Ruimtelijke Ontwikkeling, Infrastructuur en Milieu”, pues su amienda pa gobierno crea un fondo pa renegocia terenonan erfpacht cu ta destina pa construi mas camber di hotel, si e tabatin un vision corecto, lo no tabatin e tipo di problemanan cu awor a lanta cabes.
Realidad di e hecho ta cu si tuma na consideracion cu Otmar Oduber na 2011 a presenta un rapport “Winning the Future” awor na 2025 e “future” a yega y tumando na consideracion e hecho cu Otmar Oduber den eleccion di december ultimo a logra sosten di 2419 voto, Minister di Turismo actual, Wendrick Cicilia a logra sosten di 4894 voto loke tin cu wordo considera pa tur hende, cu “Minister Cicilia is the future!!!!!”
