Tin masha dia sin mir’e, pero e biaha aki el a bin bek den publicacion cu tur documento y cla pa papia. Ta nada otro cu ex-minister y sospechoso principal den caso Flamingo, Otmar Enrique Oduber. Ta pendiente keto bay pa un decision den e caso. A ricibi informacion oficial cu e investigacion den e caso Flamingo a termina y awo ta pendiente pa sentencia.
Na aña 2019 tur cos a cuminsa ora cu Landsrecherche a ricibi ordo for di fiscal Bos di Ministerio Publico pa cuminsa investiga Otmar Oduber pa posibel iregularidad cu tereno di pueblo. For di e departamento, Bureau Criminele Inlichtingen (BCI) tabatin diferente informacion cu a drenta cu Oduber ta meti den caso dudoso cu otorgamento di tereno. Un di e prome informacionnan cu a drenta ta cu; Otmar Oduber ta envolvi den negoshi cu Venezolano den bendemento di tereno. For di eynan a sigui investiga te cu a tene un entrada hudicial riba 20 di juni 2020. A drenta su cas na Pavia 123, a drenta unda e tabata keda e momento ey na Gold Coast y tambe cas di su mayornan na Ponton.
Locual Oduber a subraya durante e conferencia di prensa ta cu, a acus’e di shete punto grave, cual hasta ta compar’e cu Chapo Guzman. Y awe e caso ta basa puro riba shisheria, di entre otro Marisol Lopez-Tromp. Tromp riba 2 di juli 2020, pues algun dia despues cu a tene entrada hudicial na cas di Oduber, a entrega un keho contra dje. Lopez-Tromp a entrega keho contra Oduber basa riba supuesto ambtenaar spirito, caminda cu nan ta ricibi salario y nunca ta presenta na trabou. Ta bon pa tene na cuenta si cu Otmar Oduber y Marisol Lopez-Tromp tabata colega di otro, Tromp a bira minister despues cu Oduber a retira di politica. E tempo ey, prome cu a baha Tromp como minister, e tabata declara cu Oduber casi tabata fors’e ken e tin cu regla cos p’e of no. Y Tromp no tabata bay na su amen.
Otmar Oduber ta sinti cu ta uza instrumentonan hudicial pa persigui un politico cu tin otro pensamento cu esun, cual a pasa den su caso, segun Oduber. E team di RST no ta compronde e sistema di politica na Aruba. Tabata puntra Oduber den su interogacionnan, dicon e tabatin cierto ambtenaar riba contract ta traha cu ne sin cu tin un vacatura p’e. Oduber parce a dura como un dia henter pa splica nan riba e sistema politico na Aruba, caminda cu e minister ta nombra su hendenan di confiansa pa traha cu ne. Claro, na final, nan ta bay cu ne tambe ora e no ta minister mas.
E caso a converti su mes for di supuesto labamento di placa, soborno, forma parti di organisacionnan criminal, haci abuso di su poder y mucho mas pa shisheria di Marisol. Segun Oduber, Marisol Lopez-Tromp a yeg’i gaña husticia mas biaha den pasado. Den e caso contra Chris Dammers, tabatin un decision pisa contra dje. Hasta e mester a paga cen e tempo ey. No a puntra Oduber nada mas over di e prome acusacionnan. Tampoco a puntr’e nada tocante e materialnan cu nan a confisca na su cas y cas di su mayornan.
E sospechoso, Otmar Oduber ta lamenta masha e caso aki. Cu a cuminsa den un caso cu ta parce Chapo Guzman pa awe den shisheria. No tabatin ni un yamada di telefon, whatsapp of email caminda por mira cu Otmar kier a maluza su poder of cu un comerciante kier a cumpr’e of si a faborece un persona compara cu e otro. E caso a caba cu ne den tur sentido di palabra, e ex-minister a subraya. Financieramente, su negoshinan, hasta cu banco, caminda cu sin cu tin un sentencia, un banco local a nenga di habri un cuenta pa su negoshi. El a gasta mas di 60 mil florin na abogado pa por a bringa su caso y gan’e tambe. E ta kere firme cu e ta inocente den e caso.