E proceso di screening cu ta tardando, tin atencion di henter Aruba. Otmar Oduber, di e fraccion di PPA, tambe ta siguiendo e situacion aki di cerca y ta consciente di e tardansa den e proceso di screening.
E ta kere cu a core pasa leynan djis pa mustra cu ta transparente y integro, trata di mustra cu ta mas santo cu Papa di Roma, pero no a haci un bon evaluacion di esaki. E mesun cos cu financiamento di partidonan politico, cu a trece como consecuencia cu a fomenta cosnan anti-transparente tuma luga. E ley no ta crea nada di e integridad cu ta buscando, cu kier tin mas control den politica.
E ta kere cu no ta lesa e documentonan bon y esey ta e consecuencianan cu ta sinti awo.
Pa loke ta e ley di screening, e ta sinti cu e ta bay demasiado leu y un persona cu ta un politico no tin control p.e. riba amistad di un yiu, of ki actividad cu un ruman cu ta pafo di cas ta involucra den dje. “Door cu nos ta biba den un comunidad hopi chikito, e proceso di screening aki ta bay hopi leu. E ta imposibilita pa den futuro haya hendenan interesa den politica, pasobra no por controla kico un famia ta haci.”
Oduber ta preocupa cu dos partido cu a vota na fabor, ta papia awe di revisa e ley. “Mi no por bisa nada awo. Mester evalua si loke tin den e ley ta mucho leu, of si ta un of mas candidato cu ta bou screening ta den problema pa via di un di e procesonan cu mester luga.”
Loke e ta haya absurdo ta cu den un luna no tin un update di con e proceso ta bayendo. Na momento cu ta trata di un persona publico, politico, e ora comunidad tin derecho di sa cual ta resultado di e screening aki. “Si bo no kier, bo mester a bira dokter of abogado, y no politico.”
